Panington gyud pagpangampanya

Kon madayon nga sila si Konsehal Joy Pesquera ug ang artista nga si Richard Yap maoy moatbang kanila ni Kongresista Rodrigo Abellanosa ug Raul del Mar sa eleksiyon sa sunod tuig, kinahanglan gyud sila nga mokampanya pag-ayo.

Gikunpirmar na ni kanhi mayor Michael Rama, ang pangulo sa Team Rama, nga si Pesquera maoy ilang kandidato pagka-kongresista sa south district.

Apan dili pa sigurado kon madayon ba nga si Yap maoy padaganon sa Team Rama pagka-kongresista sa north district.

Dili ikalimod nga lig-on na sila si Abellanosa ug Del Mar sa tagsa-tagsa nila ka distrito kay mga incumbent man sila nga kongresista.

Wala na man gani modayon si kanhi kongresista Antonio Cuenco sa iyang tinguha nga atbangan si Abellanosa kay natan-aw gyud niya nga maglisud siya.

Apan dasigon nako si Konsehal Pesquera nga mopadayon sa iyang tinguha aron adunay lig-on nga kaatbang si Abellanosa.

Pero kini si Richard Yap hinoon, tan-aw nako, mag-usik-usik na lang siya sa iyang kwarta ug kahago kay dili gyud siya makapilde ni Del Mar.

Pagka-bise mayor, nakapahibalo na man si Rama nga siya maoy modagan sa ilang grupo sa Team Rama.

Dinhi nga bahina, ang Bando Osmeña Pundok Kauswagan (BOPK) maoy maproblema sa pagpangita og lig-on nga iatbang nila ni Rama.

Usbon nako, bisan og wala na sa pwesto si Rama apan dili ikalimod nga daghan gihapon siya og supporter.

Sa mga konsehal, dili usa ko mohimo’g komentaryo kay wala pa man mohimo’g pahibalo ang masi’g ka pundok.

* * *

Maayo kay giaksiyonan na gyud sa National Bureau of Investigation (NBI) ang nagkadaghan nga ilegal swertres.

Nakadungog ko nga didto ra sa usa ka lungsod sa west coast Cebu ang gironda, sa ubang dapit, apil na dinhi sa dakbayan wala pa rondaha ang mga illegal swertres outlets.

Ang akong nadunggan nga mireklamo ang usa ka legal nga kompaniya nga maoy nakakuha og kontrata sa PCSO sa pag-operate og outlets nga gitawag nila og Small Town Lottery (STL) apan wala diay pagtugot sa PCSO, sa ato pa ilegal.

Unsaon, tan-aw nako niini, ang kadagkoan sa PCSO mura’g kakunsabo sa mga operator niining illegal swertres/STL booking outlets kay nganong wala man sila magtagad? Klaro kaayo uy.

Daghan kaayo kini sa lainlaing kabarangayan dinhi sa siyudad, ang uban gud, nagtupad ra.

Diha sa Junquera Street, ang booking outlet anaa ra daplin sa karsada nga gamay ra gyud kaayong bentana nga ang mga sugarol ra ang makatultol.

Unta, aksiyonan kini sa NBI.