Pahit ni Digong

Morag wala pa gyud mihupas ang kalagot ni Presidente Rodrigo Duterte ngadto kang Cebu City Mayor Tomas Osmeña.

Iya na usab nga gipikhan ang mayor tungod sa pagsulod sa mayor sa presinto sa pulis ug pagluwas sa mga dinakpan sa niaging bulan.

Sa atong nahibaw-an, tulo ka tawo ang gidakop sa kapolisan tungod sa giingong ilang pagbaligya og mga butane canister nga gisudlan og liquefied petroleum gas (LPG).

Ilalum sa balaud, ilegal kini tungod kay delikado nga mobuto.

Apan miabot si Osmeña sa Parian Police Station tungod kay gusto niyang pabuhian ang maong mga dinakpan.

Wala ka ugpo ang on duty nga mga pulis sa presensiya sa mayor, kinsa milampos pagsakmit sa mga dinakpan aron mailalum sa iyang kustodiya.

Grabe usab nga nakabatikos ang mayor sa kapolisan tungod sa pagdakop niadtong tulo ka tawo.

Matud niya mitabang lamang kuno siya pagpagawas niadtong mga dinakpan sa ilang pinobre nga panginabuhian.

Apan wala palabya sa kapolisan ang gibuhat ni Osmeña ug nga ilang gikiha ang mayor didto sa opisina sa Ombudsman.

Sa ilang complaint, mialigar ang kapolisan nga ilegal kadtong pagpamugos ni Osmeña pagpagawas sa maong dinakpan.

Karon mipika na usab si Presidente Duterte kang Osmeña gumikan sa maong insidente sa iyang pagbisita didto sa Ilocos Norte sa niaging adlaw.

Sa ikaduha ka higayon, iya na usab nga gilabhan ang atong mayor kinsa iyang gipasanginlan nga “crazy.”

Sama sa gihapon, wala makaugpo si Osmeña sa mahait ug nagkalayo nga buga sa baba sa presidente.

Si Konsehal Margot Osmeña, ang iyang asawa, ang mitubag sa bira sa presidente.

Matud niya nga na-misinformed lamang si Duterte sa mga nagpalibot kaniya.

Hinuon, maayo ra usab nga wala mitingog si Mayor Osmeña.

Kay kon mipika usab ang mayor batok sa presidente, delikado nga basin kon mosamot pagsilaub ang tensiyon.

Akoy nahadlok nga basin unya kon matinuod gayud ang taho sa iyang umaabot nga suspenso.