Problema sa BOPK

Dili ikalimod nga bisan og gipasanginlan ni Presidente Duterte si kanhi mayor Michael Rama nga drug protector, apan ang iyang mga dumadapig wala motuo niini ug andam gihapon nga mopaluyo kaniya.

Mao nga nakaingon ko nga tukma gyud kaayo ang hukom ni Rama nga mag-bise mayor na lang, kay kon mayor man ang iyang daganan, ilabi na nga molansar usab si Vice Mayor Edgardo Labella, aw segurado gyud nga modaug si Mayor Tomas Osmeña.

Karon nga si Labella na lang ang molansar pagka-mayor sa Barug Team Rama, aw magtigi na gyud sila si Osmeña nga magpapili pagbalik sa sama nga katungdanan.

Ang Bando Osmeña Pundok Kauswagan (BOPK) nangita pa og kinsa ang ilang iatbang kang Rama.

Dili pa dugay, gipalutaw nila ang posibleng pagbalik ni kanhi vice mayor ug karon Konsehal Joy Augustus Young nga padaganon pagka-bise mayor. Gani, ang profile picture ni Young sa social media may gibutang na nga “vice mayor.”

Unya, si Konsehal Franklyn Ong, ang presidente sa Association of Barangay Councils (ABC), giawhag kuno sa pipila ka barangay kapitan nga padaganon pagka bise mayor.

Apan si Ong mitataw nga wala siya’y plano nga mag-bise mayor.

Ang laing duha ka opisyal nga gitan-aw nga padaganon sa BOPK pagka-bise mayor mao sila si Konsehal Dave Tumulak ug si Konsehal Mary Ann delos Santos.

Aw, kini hinoon sila si Tumulak ug De los Santos andam gyud modagan kon si Tommy na ang momandar kanila.

Tan-aw nako, kon kinsa man ang padaganon sa BOPK pagka-bise mayor, kinahanglan gyud nga mangampanya pag-ayo kay sa ako na nga giingon, lig-on pa gihapon si Rama ug daghang mga dumadapig.

Bahin ni Labella ug Osmeña, hisgotan nato kini sa sunod nga mga lindog, kay aron makahisgot usab kini og ubang isyu.

* * *

Uy, atensyon sa mga nagdumala sa environmental office sa Barangay Panoypoy, Consolacion. Unsa man kanang nagpadayon nga pagpangubkob sa bukid diha, may pagtugot ba kana sa Department of Environment and Natural Resources (DENR)?

May mireklamo nako kay atol niadtong kusog nga uwan sa miaging semana, nagbaha ug sagol lapok gikan sa dapit nga gipangkubkob ang bukid ug nakaapekto kini sa mga lumolupyo sa maong lugar.

Awhagon nako ang mayor sa Consolacion ug kadagkoan sa DENR nga ipasusi kini sa labing dali nga panahon. Kon may permit man gani, kinahanglang duna sila’y protection aron nga ang ilang gihimo dili makasakripisyo sa katawhan.

* * *

Ang mga reklamo, ilabi na sa drugas ug ilegal nga sugal, ipadala sa 0943-0766611.