2nd runway sa MCIA angay nang tukoron

Daghan ang nabalaka nga mahitabo dinhi sa Mactan Cebu International Airport ang susama nga insidente sa pagsadsad sa usa ka eroplano gikan sa China didto sa Ninoy Aquino International Airport sa niaging semana nga mihasol og liboan ka pasahero.

 Dili kini layo nga dili mahitabo dinhi gumikan kay usa lamang ang runway diha sa MCIA.

Kon simbakong adunay abyon nga maaksidente ug mobabag niini, dako gayud kini nga puwerhisyo sa mga pasahero sa maong tugpahanan.

Busa dakong leksiyon ang nahitabo nga insidente didto sa NAIA alang sa mga lokal nga opisyal dinhi. Nga kinahanglan gayud nga magtukod na og bag-ong runway diha sa MCIA, ang ikaduha nga labing dako nga tugpahanan sa nasud.

Hagbay ra nga mihimo si Cebu City north district Representative Raul del Mar og lakang alang sa katukoran sa ikaduha nga runway diha sa MCIA.

Apan hangtod karon, wala pay kisaw ang mao nga lakang.

Kinahanglanon na gayud ang ikaduha nga runway diha sa MCIA.

Kini gumikan kay grabe na ang pagsaka sa gidaghanon sa mga pasahero niini, ilabina nga miarangkada na usab ang ikaduha nga terminal sa maong tugpahanan alang sa mga international flights.

Sa nahitabo didto sa NAIA, grabe nga batikos ang naani sa mga opisyales sa maong tugpahan ug sa Departamento sa Transportasyon tungod sa kadugay pagkuha sa nabarang eroplano gikan sa China.

Tiaw mo na nga ang maong insidente mitanggong sa liboan ka pasahero sulod usa ka adlaw ug tunga. Sulod sa 36 oras, napugos ang mga pasahero og katulog sa salog sa maong tugpahanan samtang nagpaabot kon kanus-a sila makalarga.

Tuod man misakay na ang atong mga magbabalaod sa maong problema.  Si Senadora Grace Poe mohimo kuno og lakang alang sa Senado pag-imbestigar sa maong hitabo, lakip na ang isyu sa kadugay sa paghaw-as sa maong  eroplano gikan sa China.

Ang maong insidente nagdugang lamang sa pagkanotoryos sa NAIA. Sa niaging mga tuig, lakip kini sa lista sa “Worst Airports in Asia” tungod lagi sa ka walay klaro nga serbisyo.

Kini gisamotan pa sa kontrobersiya sa “tanim bala” diin daghan sa mga pasahero ang gipasanginlan nga nagdala og mga bala sa ilang mga bagahe.

Karon, aron paglikay sa susama nga insidente, angay na gayud nga dalion pagtuman ang plano pagbutang og ikaduha nga runway diha sa MCIA.

Hagbay ra kini nga gisugyot. Ug panahon na nga matuman kini.