Umento sa presyo sa ulo

Dili lang ang presyo sa mga palaliton ang miumento karon, misaka usab ang presyo sa ulo sa mga pulis nga nalambigit sa ilegal nga drugas.

Gikan sa dos milyones pesos niadtong tuig 2016 gipatas an kini karon ngadto sa singko milyones pesos.

Gipahibawo kini ni Presidente Duterte nunot kini sa nagpadayon nga paglipang sa mga pulis nga miduwa gihapon sa drugas.

Human giluwatan sa presidente ang iyang pulong, duha ka pulis dayon didto sa Mindanao ang napatay sa ilang mga kabaro.

Lehitimong operasyon ang gihanig sa kadagkoan sa PNP aron ma-justify ang pagpatay sa ilang mga target.

Adunay special team nga gitahasan sa paggukod ug paglikidar sa mga narco-cops.

Kinsa man ang makaangkon sa singko milyones pesos nga patong sa ulo?

Giklaro ni PNP Chief Oscar Albayalde nga dili mahiadto sa kamot sa mga pulis ang kwarta nga makapatay sa ilang kabaro kon dili didto sa impormante.

Apan murag ngilngig paminawon nga sila mismo ang mag-unay sa pagpinatyanay.

Hinoon dinhi pud nato makita ang kamatinud-anon nila sa ilang trabaho nga walay ilhon basta nakasala patyon.

Patas na ang mga sibilyan ug mga pulis nga magpabadlong, prisohan o menteryo ang padulngan.

Unya mahurot gyud ang mga pulis ani kay daghan man kaayo sa ilang organisasyon ang mga badlongon?

Aw kadtong nagtinarong walay angayan hunahunaon apan ang mga badlongon kahibalo na mo asa paingon.

Mao ni ang tinud-anay nga internal cleansing nga bayran og lima ka milyon ka pesos ang matag ulo nga ilang malimpyo.