Di pa laos si Lim
Samtang dako na kaayo ang kalainan karon nga nalutsan na og warrant of arrest ang gipasanginlang drug lord nga si Peter Lim kay sa nangaging katuigan nga wa gyuy nakatandog niya, abunda gihapon ang mga timaan sa kadako sa iyang impluwensiya sa nagkalainlaing mga buhatan sa gobiyerno, apil na sa kapolisan.
Ang pagpasaka sa kaso batok niya sa korte mura ra og pinugos.
Nahimo lang human sa sibaw nga mga pagsaway nga nahiagoman sa pamunoan ni Presidente Rodrigo Duterte dihang gibasura unta nga huyang ang mga ebidensiya batok ni Lim.
* * *
Bisan gibalikbalik sa Malakanyang ug kapolisan nga ang pagkiha nilang Lim maoy di malalis nga ebidensiya nga way gipaboran ang kampanya batok sa ilegal nga drugas, kay bisan ang labing dagko sama ni Lim nadutlan na man, ug bisan isog ang ilang mga pasidaan nga tultulon ang iyang mga tagoanan ug dakpon siya sa labing daling panahon, nabantang ang kaahat sa mga paningkamot sa pagbalhog niya sa prisohan.
Gawas nga wa mag-apura ang kapolisan sa pagpatuman sa arrest warrant, nagpagoryo-goryo pa gyud sila nga wa mahibawo sa posible niyang mga tagoanan.
* * *
Palihug tabang og ihap:
• Agosto 10 giluwatan sa Makati City Regional Trial Court ang warrant of arrest batok ni Lim;
• Agosto 16 (human na sa usa ka semana) nga nadawat sa kapolisan sa Dakbayan sa Sugbo ang kopya sa warrant; ug
• Agosto 20 (gipalabay una ang tibuok weekend) na nga gihatod sa kapolisan ang warrant sa mga pinuy-anan ni Lim.
* * *
Laing timaan nga di seryoso ang mga polis sa pagpangita ni Lim:
Una nilang girumbo ang pinuy-anan sa inahan ni Lim sa Barangay Kasambagan bisan sa kasayuran nga wa na pakita si Lim didto sa niaging usa na ka dekada.
Gawas sa bay ni Lim sa Sto. Niño Village sa Banilad, may mga pinuy-anan pa siya sa ubang bahin sa Sugbo.
Apan nagpakaaron-ingnon ang mga polis nga wa sila katultol ug nidiretso na og tahan.
Ang huhungihong nga nakabiya na si Lim sa Sugbo ug sa Pilipinas tulo ka buwan ang nilabay apan way rekord ang Buro sa Imigrasyon sa iyang pagbiyahe maoy laing timaan nga di lang mga polis ang iyang nagawongan.
* * *
- Latest
