EDITORYAL - Bastos nga Chinese

Maayong pakpakan si Pres. Rodrigo Duterte sa iyang paglatos sa gihimo sa mga Chinese didto sa West Philippine Sea. Talagsaon ra kaayo kini nga si Duterte nga nakigsuod sa China mitingog batok sa agresibo nilang taras didto.

Pipila ka semana na ang milabay dihang ang mga Pilipinong piloto sa Philippine Air Force gihulga-hulga sa Chinese air controllers sa usa sa mga artipisyal nga isla diha sa West Philippine Sea.

Ang abyon sa Pilipinas naghimo og routine military patrol sa teritoryo niini apan paglabay niini sa usa sa pito ka artipisyal nga isla gibaharan sila sa mga Chinese pinaagi sa radio ug gipapahawa dalang pasidaan nga may dautang mahitabo kon di sila mopatuo.

Ang maong lugar giilogan sa lima ka mga claimant countries nga mao ang Pilipinas, Vietnam, Malaysia, Brunei ug Taiwan apan niapil-apil ang China ug kay mas adunahan sila maoy nakauna pagpangtukod og artipisyal nga mga isla nga iya sa teritoryo sa lungsod sa Kalayaan didto sa West Philippine Sea.

Si Duterte kinsa niadtong campaign period misaad nga mosakay og jet ski dala ang Bandila sa Pilipinas moadto sa gihimong mga isla sa China aron iugbok kini didto, nasagmuyo sa taras sa mga Chinese apan subli niyang gipahibalo nga managhigala ang duha ka nasud.

Ang palisiya sa China ngadto sa mga claimant countries wala mausab sukad nga ilang giangkon ang maong mga teritoryo, padayon nilang giinsister nga ilaha ang maong lugar ug may katungod silang depensahan kini  ug ang ilang soberiniya.

Ang US nakasinati usab og susamang tratamento  apan sa paagi nga sibil ug way pagpanghulga gikan sa Chinese controllers. Tungod ba kay kusgan sila nga nasud?

Nganong ang taras nila ngadto sa mga Pilipino bastos ug may dala pang hulga? Tungod ba kay di kita kakusgan sama sa Amerika?  Maayo unta og nasabtan sa China ang mensahe ni Duterte, apan unsa kaha iyang buhaton kon magpadayon kini?