Ngano kahang gidalidali?

Unsa kahay tulobagon ni Mayor Tomas Osmeña ug sa mga konsehal nga kauban niya sa Bando Osmeña Pundok Kauswagan (BOPK) ngadto sa mga Sugboanon sa ilang pagpugos og entra og kontrata tali sa Universal Hotel and Resorts Inc. sa mga Gokongwei?

Gipugos ang pinirmahay sa Joint Venture Agreement (JVA) tali sa kagamhanan sa dakbayan sa Sugbo ug sa UHRI bisan makausa gibasura na kini sa Konseho.

Gibuhi og dali-dali ang ordinansa paghatag og gahum ni Osmeña pagpirma sa JVA tali sa UHRI sa dihang nakuha nila ang mayoriya, human dag-a sa iyang alyado ug suod nga higala nga si Kapitan Franklyn Ong sa Kasambagan isip presidente sa Association of Barangay Councils (ABC).

Ang punto sa oposisyon padayong wala tagda sa mayor ug sa mga konsehal sa BOPK, kini mao:

1.  10 porsiyento lamang ang bahin sa abang ang makuha sa siyudad sa Sugbo sa P10 bilyones nga balor sa Kawit Island ug P18 bilyones nga balor sa development sa UHRI; (sa P28 bilyones, nganong dili man 30 ngadto sa 40 porsiyento sa siyudad nga sobra sa 1/3 man ang investment sa siyudad?)

2.  Sa ika-20 ka tuig pa o sa 2027 magsugod og hatag sa bahin nga 10 porsiyento ang UHRI.

Si kanhi gobernador Pabling Garcia nga usa ka constitutionalist miingon nga dili mahimong magpa-abang ang siyudad sa Sugbo sa Kawit Island kon walay pagtugot (permit) gikan sa Kongreso.

Kini tungod sa balaod nga ang mga “lands of public domains” nga iya sa Pilipinas (owned by state) ang Kongreso lamang ang makatugot sa pag-dispose niini sama sa pagbaligya, pagdonar ug pagpaabang.

Niadtong Agosto 7, sa dihang gipugos og banhaw ang Kawit Island deal, gi-adjourn sa konseho ang sesyon. Ang ordinansa paghatag og gahom ni Tomas pagpirma sa JVA tali sa UHRI gipasar sa mga konsehal sa BOPK nga sila-sila na lang kay nanglakaw na ang mga konsehal sa minoriya.

Pangutana: Legal ba ang maong ordinansa paghatag og gahum ni Tomas pagpirma sa JVA bisan og na-adjourn na? Ang pagpuli sa usa ka konsehal sa BOPK sa pag-preside sa sesyon bisan na-adjourn na gitugot ba sa house rules sa konseho sa siyudad?

Si Konsehal Amilo Lopez sa Barangay Busay mipasaka og kasong injunction sa korte pagpahunong sa JVA. Apan gipadayon gihapon ni Tomas ug sa UHRI ang pagpirma sa JVA.

Hmmmm. Dili ba kaha atngan na lang nila sa korte ang kaso aron adto na lang lutoon?

Pagkamakaluluoy sa mga Sugboanon kon ang mayor ug mga konsehal sa BOPK mo-intra og negosyo nga alkanse ang mga Sugboanon.

Unya og kuwestiyonon iyang lakang, ang mga tawo, lakip na ang mga sakop sa oposisyon sa Barug PDP-Laban iyang panghinganlan og dili mao.  Iyang tawgon og “team suyop” sa Facebook. Paeta na lang gyud.