Nganong ganahan mokanaug si Digong?

Gusto kuno ni Presidente Rodrigo Duterte nga mo-resign sa katungdanan tungod lagi sa iyang dakong kasagmuyo sa padayon nga pagkuyanap sa corruption sa halos tanang departamento ug ahensiya sa gobiyerno.

Sa niaging semana, nagpadungogdungog na si Duterte nga mora’g gipul-an na siya sa iyang puwesto. Gani, basin kuno nga mo-resign siya kon modaug si Bongbong Marcos sa iyang election protest batok kang Bise Presidente Leni Robredo.

Gawas ni Marcos, gibutyag ni Duterte nga mas gusto usab siya nga si Senator Chiz Escudero maoy mopuli kaniya kon ugaling mo-resign siya sa katungdanan ug dili ang constitutional successor nga si Robredo.

Siguro dako ang kasagmuyo ni Duterte nga wala matuman ang iyang gisaad kaniadtong panahon sa kampanya sa wala pa ang piniliay sa 2016. Mao nang nakahunahuna siyang mokanaug na lamang sa katungdanan.

Hinuon, ang iyang gisaad nga bungkagon ang problema sa druga sulod sa unom ka bulan sa iyang pangatungdanan wala gayud matuman.

Hangtud karon padayon ang dakong kumbati sa kagamhanan batok sa druga.

Sama sa gubat batok sa druga, nagkainit usab ang kampanya sa gobiyerno batok sa corruption.

Apan bisan pa sa pagsipa sa pipila ka opisyal sa gobiyerno tungod sa anomaliya, padayon ang gamot sa corruption nga naglikos sa tanang buhatan niini.

Apan bisan pa sa dakong problema sa druga ug corruption, dili angay nga mokanaug si Duterte sa iyang katungdanan.

Bati nga paminawon nga ang presidente mikakak na hinuon kay dili na maagwanta ang pagsulbad sa mga problema sa nasud. Hinuon wala pay presidente sa nasud ang mi-resign tungod niini.

Sa atong nakita ni Duterte, isog kini  nga lider nga walay gikahadlokan.  Gani mao kini ang nag-unang rason ngano nga 16 milyones ka Pilipino ang mituboy kaniya sa katungdanan.

Nasayod usab sila sa dakong kalampusan ni Duterte sa iyang pagkamayor didto sa dakbayan sa Davao kaniadto.

Hinuon, kining taho sa iyang intensiyon pagkanaug sa iyang katungdanan naghatag lamang og bati nga persepsiyon sa katawhan kaniya. Tungod kay dili kalikayan nga ila unyang sabton ang iyang pamunoan nga usa ka huyang ug walay dugokan.