Hulga sa kinabuhi sa mayor?

Unsa ka tinuod kining report nga aduna kunoy mga hitmen nga buot mopatay kang Mayor Tomas Osmeña sa dakbayan sa Sugbo?

Kini ang gibutyag mismo sa mayor taliwala sa mga paglikidar niining mga pipila ka personalidad sa siyudad ug lalawigan sa Sugbo.

Matud sa mayor, adunay taho nga iyang nadawat nga adunay lima ka polis ug upat ka sibilyan ang nia karon sa Sugbo nga giingong mga hitmen ug usa kuno siya sa ilang mga target.

Hinuon hagbay ra kuno nga adunay hulga sa iya nga kinabuhi si Osmeña.

Gani, iyang gibutyag nga siya ug ang kanhi kapitan sa Barangay Tejero ug karon konsehal nga si Jessielou Cadungog ang dugay rang nakadawat og mga death threats.

Kini sa wala pa usab mahitabo ang giingong pakyas nga pagpamanhig kang Cadungog sa niaging mga semana.

Karon unsa ka seryoso kining hulga sa kinabuhi sa mayor? Hinuon siya ray nasayod. Wala niya gibutyag sa media kon asa siya niini nga inpormasyon.

Hinuon iya kunong gibutyag sa publiko ang hulga sa iyang kinabuhi aron magmaigmat ang katawhan ug aron nga mahibalo kadtong buot mopatay kaniya nga aware siya sa maong mga hulga.

Kon tinuod man ugaling kini, unsa may dakong hinungdan ngano nga anaa man ang mayor sa listahan sa mga ilikidar?

Aduna ba siyay kalambigitan sa ilegal nga binuhatan nga angay man siya nga pahilumon?

Or aduna bay personal nga isyu ang mayor nga nakamugna og mga kaaway nga gusto nang motipi kaniya?

Ako mismo walay nakita nga dakong rason nganong adunay nag-interest sa kinabuhi ni Osmeña. Gani wala ko makadungog og akusasyon batok sa mayor nga nalambigit kini sa mga ilegal nga binuhatan. Wala usab kini sa listahan ni Presidente Rodrigo Duterte isip usa sa ka drug protector nga politiko.

Basin ang sige niya og banghag sa kapulisan nga mao kuno ang nagpaluyo sa mga pagpatay sa Sugbo maoy nakaaghat kaniya pag-alegar nga aduna kunoy mga hitmen dinhi nga gustong mokutlo sa iyang kinabuhi. Dili ba nga grabe man karon ang iyang akusasyon batok sa kapolisan gumikan sa insidente nga gikalambigitan ni Cadungog?

Hangtud nga makapagawas ang mayor og konkreto nga ebidensiya mahitungod sa giingong mga hitmen nga gusto nga molikidar kuno kaniya, daghan gayud ang magduda sa katinuod sa iyang mga death threats.

Aw, dili lamang siguro mokumpiyansa ang mayor kay basin kon adunay pipila nga adunay kayugot kaniya ug mosakay na unya sa panahon.