Nangluno sama sa bitin

Sa sunod tuig na man diay ang midterm elections apan karon pa lang nagsugod na sab sa pagpangluno sa ilang panit sama sa bitin ang mga politiko kinsa nagpanikad nga motapon sa lig-on ug gamhanan nga partido.

Dili ang PDP Laban ang akong gitumbok kon dili ang bag-o pa lang nahimugso nga Hugpong sa Pagbabago nga giumol ni Davao City Mayor Sarah Duterte.

Bisan og usa lang kini ka regional political party apan mas impluwensiyado kining grupoha busa nagpanikad na ang mga balimbing ug mga chameleon sa pagtapon alang sa ilang political survival.

Ubay-ubay na nga mga national party ang nakig-alyansa sa Hugpong sa Pagbabago kay nasayod sila nga hayag ang ilang padulngan kauban ang partido nga gimugna sa anak sa presidente.

Kon kaniadto o bisan karon murag nag-exodus ang mga politiko pagbiya sa ilang mga partido ug mitapon sa PDP Laban ni Presidente Duterte, mao usab kini ang mahitabo sa higayon nga maresolbar sa grupo ang conflict mismo sulod sa partido.

Gawas pa, si Presidente Duterte murag gipunit ra siya kaniadto sa PDP-Laban nga maoy himoong standard bearer ug dili gyud siya ang founder busa dako kaayo ang kahigayonan nga suportahan niya ang partido sa pinangga niyang anak nga si Inday Sarah.

Una nang gibutyag sa presidential daughter nga bukas ang ilang grupo pagdawat sa PDP apan adunay kondisyon.

Hiloton kuno daan ang kaguliyang sa nabahin nga mga miyembro, apan murag imposible man kay bisan ni interbiner na ang pangulo pakyas man gihapon nga maplantsa ang isyu.

Ang labing dako nga isyu ang pagpabilin sa PDP ni kanhi House Speaker Pantaleon Alvarez nga gikaengkwentro ni Inday Sarah. Sa lokal nga kamada, kinsa kaha ang makauna? Dako og kahigayonan ang grupo ni Mayor Tomas Osmeña kon makig-alyansa sa Hugpong sa Pagbabago.

Gawas lang siguro kon putlon og una-una sa Barug ang ilang kalambigitan sa PDP ug mohurar na pud sa bag-ong naumol nga regional party.