Gilubong ang patay’ng lawas?

Sagad natong madunggan gikan sa mga field reports ang bahin sa pagpatay o paglubong sa patay’ng lawas sa usa ka biktima sa pagpamatay.

Ambot ngano nga ila mang i-emphasize ang paglubong sa patay’ng lawas? Ngano man diay duna bay ilubong sa buhing lawas?

Sa Inenglis di sila mogamit og dead body. Igo lang silang moingon nga “the body was interred, or the body was exhumed, or the body now lies at ….” Kay lagi patay na man nganong patyon ma’g usab? Double dead na.

* * *

Giingon dinhi nga napakyas si Presidente Digong Duterte pagsulbad sa nagkabangi nga duha ka faction sa PDP-Laban, pinangulohan nila ni Senador Koko Pimentel ug Atty. Rogelio Garcia. Kini, tapus sa lima ka oras sa panagtagbo sa duha ka pundok uban sa Presidente.

Kon dili sila magkasabot lagmit magkabuwag g’yud ang duha ka faction. Ug ila na usab kining lantugian kon kinsa kanila ang magpabilin sa PDP Laban o kinsa ang magtukod og laing partido.

Gipanghinaut nga maresolbar ang ilang mga differences sa dili pa ang pag-file sa COCs alang sa 2019 elections. Otherwise, ang Team Rama-PDP Laban dinhi sa dakbayan, maglibog asa sila modapig o ila na bang isalikway ang PDP Laban ug motapon ngadto sa Hugpong Ng Pagbabago.

In the meantime, si Mayor Sara Duterte namahayag nga andam siyang motabang sa PDP Laban. Matud niya: “If there is anything that HNP can do to help PDP-Laban, our group is ready to assist them.”

Moy gidangat! Daku kining insulto kabahin ni kanhi Speaker Pantaleon Alvarez, nga ang partido nga mamahimo nilang kaatbang sa umaabot nga eleksyon, mao na hinuoy motabang pagsulbad sa ilang problema.

Ug taliwa niining kaguliyang sulod sa PDP-Laban, ang kang Mayor Sara nga HNP nagkalig-on. Karong bag-o ang HNP nakig-alayon na uban sa walo ka national ug local nga parties ubos sa Nacionalista Party.

Hinumdoman nga ang Nacionalista Party pinangulohan sa grupo nila ni  Sen. Cynthia Villar ug kanhi  Senate President Manny Villar, misuportar sa presidential bid ni Duterte sa 2016.

Gitaho usab nga ang Solid North pinangulohan ni  Ilocos Norte Gov. Imee Marcos buot makig-alayon uban sa HNP.

Hinoon, matud ni Mayor Sara: “HNP does not intend to recruit members of PDP-Laban or other national political parties.”  Atong masabot nga lahi ang pakig-alyansa , lahi usab ang pagpasakop.

Karon, mag-unsa man ang Team Rama-PDP-Laban ug ang BOPK?