Pacquiao midayeg ni Matthysse
CEBU, Philippines — Nagtuo si eight-division world champion Manny Pacquiao nga sakto ang desisyon ni Lucas Matthysse nga moretiro na sa boksing.
Si Pacquiao mikulata ug mipatikangkang ni Matthysse sud sa pito ka hugna aron pagsakmit sa WBA welterweight title niadtong Hulyo 15 didto sa Axiata Arena sa Kuala Lumpur, Malaysia.
Sayo ning bulana, ang 35-anyos nga si Matthysse mipahibawo nga opisyal na niyang gisab-it ang iyang mga gloves bitbit ang 39-5 record uban ang 36KOs.
Sa away nilang Pacquiao, si Matthysse natumba tulo ka higayon ug klarong wa'y dag-anan batok sa Pinoy ring star.
Atol sa iyang pagretiro, si Matthysse mipasabot nga ang iyang laraw nga magpadayon pa og boksing, nagkahupas na.
Sa iyang gihimo, usa si Pacquiao sa mga mipakpak ni Mathhysse.
"That's okay. He (Matthysse) really earned a lot financially in his last fight. He should be proud of his boxing career and he has a good record," matud pa ni Pacquiao.
Nagkanayon si Pacquiao nga usa ka dungog alang kaniya nga nakaaway og usa ka dekalibreng boksidor gikan sa Argentina ug haum kaayo ang desisyon ni Matthysse nga moretiro ilabi na kay nawad-an na kini og gana sa boksing. (BANAT NEWS)
- Latest
