Ulo-ulo

Dili tanang pagdayeg nagsukad sa tim-os nga pagyukbo sa imong katakos. Ang uban kanila pinasikad sa hinakog nga tinguha sa paggamit nimo labina kon alang kanila nahimo kang mapuslanon. Isi’g gamitay ang matag usa aron lamang magpadayong mabuhi diha sa tino ug komportableng lawak sa bakak ug kaway kapaingnan.

Kini tungod kay daghan ang dili buot molingkawas sa pagkaulipon sa sayop nga pagtuo ug gituohan. Nahimong daw sa tam-is ug lunsay ang ulo-ulo sa kadaghanan. Mahimo kang mokatawa bisan sayod ka nga nahimong daw sa kabahin sa halapad nga pamaaging ekonomikanhon ang gihimong duwa sa pagpasidungog bisan sayod sila nga ikaw basura sa ilang panan-aw ug baho sa ilang panimhot. Apan pinaagi nimo nahimong mas moburot ang ilang kaugalingon sa ilang kasikatan nga gipangandoy.

Apan bisan pa niini, padayon mong gihangop ang katilingbanong pakpak sa pagyubit kay nahimong nidagayday sa imong alimpatakan nga sama sa imong magtutudlo kinahanglang ikaw yubiton sa kalibutanong mga dila sa paghimaraot.

Pagmatinud-anon sa imong kaugalingon kay may pakpak man o wala ang kinabuhi imong kinabuhi ug bisan gani ang kusog nga nilatay sa uniberso di mahimong mopugong sa imong panaw sanglit kuyog nimo ang matag usa nga tipaka niini nagpanaw man usab padung sa misteryosong agianan sa gitawag nilang pagtuo nga nilakra ug mga pulong sa paglaum nga imong gikinahanglan pag-ayo aron ikaw mabuhi nga makahuloganon bisan pa man kon tiyan mokutoy ug way sulod.