Salamat dre sa Guadalupe, makatandog
JAV, BANATI! - Javier Yntig Tapulado (Banat) - August 9, 2018 - 12:00am

Manggiluy-on ang Ginoo.  Ang nangumbitay’ng dag-om nianang pagkahapon sa Agosto 5, 2018, Domingo, kutob ra sa habohabo ang nangahulog, wala gyud makadayon sa pagbundak. Daw gipugngan sa gamhanang kamot nga misapnay sa kalibotan aron ang pagsaulog sa ‘Salamat Padre’ sa 169 ka parokya sa archdiocese, mamahimong mabulokon ug makahuloganon.

Hinuon, ang Parish Pastoral Committee (PPC)  sa Guadalupe nga gidala ni Brod. Jessie Lim, isip presidente, imbes adto unta sa rooftop sa bag-ong kombento ipahigayon ang ilang ‘Salamat, Padre!’, nakahukom nga ibalhin ngadto sa Parish covered court dihang sa buntag pa lang, nag-off and on na ang buhos sa ulan.

Alas 7:30 sa gabii, giablihan ang tanang  takip sa giandam nga buffet, mibuhagay ang pag-ampo-bless  ni Fr. Dodong Desuyo sa pagkaon ug misunod ang panagsalo sa lamiang panihapon.

Nabusog dili lang ang tiyan sa tanang nanambong, kondili nabusog usab ang matag usa ka kasingkasing pag-abot sa yugto sa paghinatagay og mga gasa ngadto sa Team of Pastors. Lakip na ang usa sa duha ka residing Nigerian priests, gipalingkod ibabaw sa stage samtang nagpaabot sa mga gasa.

Kulbahinam ang misunod nga mga yugto dihang ang sugsogang  emcee, Sis. Betsy Gabutin mipasiaw pag-anunsyo: “Hala, hala, mahibaw-an na gyud kinsa nilang mga pari ang paborito sa kadaghanan?” Kada pari gud, may iya-iyang kinaiya. Busa, di kalikayan nga may pari silang mahalon ug duna puy sawayon.

Tuod man, unang gitunol ang mahalong gasa uban ang plaque of appreciation ngadto sa mga pari. Dayon, gisunod ang individual gifts nga gibitbit sa mga parokyano, diin nahimong bundo sa mga gasa ang atubangan sa kaparian nga malipayong midawat sa wala damhang matang sa gugma nga gitunol sa mga parokyano.

Natandog kong nagsud-ong sa maong matahom nga talan-awon. Kay mismo sa maong gabii, gimatuod sa mga parokyano nga may mga pari man tuod silang wala magustoi, apan may kasingkasing gihapong mohatag og  patas nga gasa nilang tanang kaparian, kinsa maoy nakapaguwapa sa simbahan sa Guadalupe nga kanhi nahisama sa batang yagit nga bisag nagkagidlay na ang sinina nga gisul-ob, wala gyod mailisi og bag-o.

Kaninyo Team of Pastors sa Guadalupe, daghan kaayong Salamat, Padre!.

 

GUADALUPE
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with