Pacquiao mobalik away sa Disyembre

CEBU, Philippines – Nabalikan sa iyang naandang kabagsik, si Pinoy ring star Manny Pacquiao nagpanikad nga mokatkat og balik sa ring karong Disyembre o lima ka bulan human sa impresibo niya nga kadaogan batok ni Lucas Matthysse didto sa Axiata Arena sa Kuala Lumpur, Malaysia. Kuala Lumpur.

Si Pacquiao wala na makaaway pa sukad siya gihuboan sa iyang WBO welterweight title ni Jeff Horn didto sa Brisbane niadtong Hulyo 2, 2017.

Nakigharong dayon siya ni Matthysse niadtong Hulyo 15 diin siya miiskor og makapakurat nga daog nga nakapahilom sa iyang mga kritiko ilabi na kadtong nagsige og paghot nga paretayron na siya.

Si Pacquiao mikumbati sa karaan niyang abilidad aron pagkadlit sa labing una niyang daog pinaagi sa knockout sud sa dul-an usa ka dekada.

Gusto ni Pacquiao nga motira dayon samtang init pa ang puthaw segun sa karaang panultihon.

"December",  mubong tubag  sa 39-anyos nga senador sa dihang  gipangutana sa The Philippine Star, ang igsuong mantalaan sa Banat News, kon kanus-a siya gustong moaway og balik.

Ang bag-ong WBA welterweight champion naglantaw sa Disyembre 2 nga petsa alang sa sunod niyang away batok sa kontra nga pilian pa niya ug sa iyang kampo.

"Wala pa. Hahanap pa lang," dugang pa ni Pacquiao nga mao gihapon ang mo-promote sa kaugalingon niyang away.

Duna na hinuo'y gisaytan si Pacquiao nga iyang kontrahon. Ang duha sa labing bug-at nga mga pangan mao sila si Vasyl Lomachenko, ang WBA lightweight champion ug si Terence Crawford, ang wala pa'y pildeng WBO welterweight champion. Apil sab sa iyang listahan mao ang kanhi niya sparring partner nga si Amir Khan ug si Mike Garcia.