Milapas ang kusina sa silingan sa iyang yuta

Dear Atty. Divine:

Duna koy gipalit nga yuta duha ka tuig na ang nakalabay.

Gipalit ni nako aron tukuran sa akong balay apan na-delayed ang akong project human nasakit ang akong nanay.

Karong bag-o naka-decide ko nga ako nang ipadayon ang akong plano pagpatukod sa akong balay.

Hinungdan nga ako ning gipasukod apan nakurat na lang ko kay ang akong kasikbit nga bag-o lang nag-renovate sa iyang balay naka-encroached man sa akong yuta og mga 25 square meters.

Ako na siyang gisultian labot sa resulta sa maong survey og siya mismo nakurat sad niini. Ang portion sa iyang kusina maoy  milapas sa akong yuta. Pwede ba ni nako nga ipa-demolish? Unsay angayan nako nga buhaton? Daghang salamat. —Rita

* **

Dear Rita:

Kon ang imong silingan nga nakalapas sa imong property matawag nga ‘builder in good faith’ or dili niya tinuyo ang paglapas niini then duna kay duha ka option basi sa Art. 448  sa atong  Civil Code,  kini mao ang pag-appropriate sa imong kaugalingon sa structure nga gitukod sa portion nga milapas sa imong yuta pinaagi sa pagbayad kaniya sa iyang nagasto ug ang ikaduha nimo nga option, imong pabayran sa imong silingan  ang portion sa imong yuta nga iyang nalapas sa reasonable nga presyo.

Buot ipasabot nga dili option ang pagpa-demolish niini tungod kay makonsiderar siya nga builder in good faith.

Ang maayo nimong buhaton imong sultian ang imong kasikbit nga bayran na lang niya sa reasonable nga presyo ang portion nga iyang nalapas sa imong yuta aron magpabiling intact ang iyang kusina. Thanks and God bless. — Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St.,Cebu City or email sa [email protected] og akong tubagon ang inyong pangutana pinaagi sa akong column matag Miyerkules, Sabado og Domingo.