Mga bulilyaso sa ATM
Duha ray naglinya sa akong kinaham nga ATM sa Consolacion. Lahi sa mga adlaw nga tingsuweldo nga taas ang linya sa mga kawani o sa mga sakop sa ilang pamilya nga nagkinahanglan og kuwarta. Duha ka ATMs ang nagtapad apan usa ra ang gilinyahan. Ang ikaduha dunay marka nga “Balance Inquiry Only.”
Ang akong naabtan lalaki nga nag-atubang sa ATM wa magdugay. Giingnan ang babaye nga nagsunod niya nga way kuwarta. Apan nisuway gihapon ang babaye ug nakakuha og kuwarta. Pag-abot sa akong turno way kuwarta nga nigawas. Sa pagtuo nga nagtokar-tokar lang ang ATM, nisuway ko og usab. Wa gihapoy kuwarta.
* * *
Kay wa na may nagsunod nako, gibasa nako pagbalik ang gamay’ng papel nga gipapilit sa ikaduhang ATM. Akong nabantang ang kinatibuk-ang mensahe: “Balance Inquiry Only. Do not remove this.” Dihang akong gisuwayan, nakakuha ko og kuwarta. Busa akong gitangtang ang papel ug gilabay sa basurahan.
Ambot kinsay nagbutang sa papel. Di gyud tingali ang taga bangko. Ambot namaregla ba lang. O naatlan gyud nga way nigawas nga kuwarta busa nagpakabana aron nga di mabawo ang mga nagsunod niya. Pila kahay nituo sa sayop nga mensahe sa wa pa nako tangtanga?
* * *
Kasagaran sa mga bangko di mangunay sa pag-atiman sa ilang ATMs. Ilang gi-outsource ang tahas ngadto sa managed service providers (MSPs) nga maoy mopabarug sa ATMs ug sa cash replenishment agencies (CRAs).
Ang CRAs maoy mokuha sa kuwarta gikan sa bangko ug moapud-apod sa kuwarta ngadto sa ATMs. Sila sab ang moayo sa depektuso nga ATMs. Kon makadawat ang bangko og reklamo sa ATMs nga way kuwarta, tawgon nila ang MSP nga mao say mopada sa CRA.
* * *
Nakontrobersiyal karong bag-o ang Land Bank of the Philippines tungod sa kapakyas sa ilang gikontrata nga MSP ug CRA sa pagtarong sa ilang ATMs nga kanunay lang madaot. Matud sa COA ang 268 ka ATMs sa Landbank kanunay lang nga mahutdan og kuwarta ug maabtan og hangtod sa upat ka adlaw una naabunohan.
Matud sa COA hingpit nga gitahan sa Landbank ang pagbuot kanus-a susihon ang ATMs nga ang kuwarta natanggong hinuon sa vault sa gikontratang mga kompaniya maong magsige og kabasiyo ang ATMs.
- Latest
