Hiusahong lig-on, lawas ug hunahuna (2)

Mao kini ang gibasehan sa mga eksperto sa Japan sa pagtudlo sa aikido martial arts, gamit ang puwersa sa kusog sa ‘ki’ nga gisentro sa pagpalig-on sa lawas ug hunahuna, nga mas kusgan kini nga mopahinay sa kusog sa kaatbang o sa palibot nga buot mopaluya sa imong kaugalingon.

Mao nga maoserbahan nato ang kalihokan sa aikido, abtik apan kalma ang lihok, nga di pa motugpa ang gibuhiang kusog, mapakgang na ang kusog sa sikolohiya og pisikal sa kaparang, mohinay hangtud malup-og.

Kini gumikan sa gihuptan nga disiplina sa kanunay gihiusa nga gipalig-on ang lawas ug hunahuna.

Ang gahum sa ‘ki’ sa pilosopiya sa mga Hapon, susama kini sa ‘qi’ sa mga Intsek. Dili kini mahimong mabuwag kanato, ang kinaiyahan o ang uniberso.

Aron kini kapuslan nga kita mabuhi nga lig-on, batok sa mga pagsulay nga kita modaug ug malampuson sa atong pagpakabuhi niining kalibutan o uniberso, diin sa kanunay giabagan kita sa mga gikinahanglang kusog sa pakigbisog.

Apan kining tanan epektibo lang nga nag-agad sa kaugalingon kon unsa kita ka agresibo sa pagdisiplina sa kaugalingon nga ato kini mabatonan.

Anaa kanato ang tanang gahom o oportunidad sa pagkab-ot sa buot nga buhaton.

Kay kon mawala na ang ‘ki’ sa kaugalingon, inanay ‘tang mobalik nga mahimong abog.

Mentras aduna pay tsansang makalihok, dili kita motugot nga dili mohimsog nga hiusahong palig-onon ang lawas ug hunahuna.

Hain man niini ang may kulang mapagan  ang kaugalingon, mahulog ra nga sama sa mga butang nga wala nay kapuslanan.

Mabuhi man, apan magkamang kita sa daghang mga komplikasyon.

Makahimsog man ang gipangaon nato, apan wala magamit ang kusog sa lawas, mapagan ang hunahuna nga magluya, gumikan sa lawas nga walay kasikas.