Pangandaman daan

Bisan unsaon dili gyud kalikayan nako nga pangulbaan matag sakay nako sa eroplano, mas palabihon pa nako ang mosakay og barko.

Advance ra seguro kaayo maghunahuna sa posibleng mahitabo apan wala man lagi tay mahimo ilabi na kon work related ug ipasakay man gyud sa eroplano aron dali maabot sa destinasyon.

Niadtong weekend nibiyahe ko sa Iloilo City tungod sa special assignment sakay sa eroplano, pag padung didto murag nagsakay ko sa sakyanan nga niagi sa libaongon nga karsada tungod sa dili maayong panahon.

Misamot na sa pagbalik diri sa Cebu kay makapanguros intawon ka tungod kay nakasinati kami og turbulence mugna gihapon sa bati nga panahon.

Nahunahuna lang nako nga unta sa dili pa molupad ang eroplano ipanghatag na lang seguro sa mga pasahero ang tanan nga gikinahanglan nga safety gear kay simbako dunay mahitabo nga disgrasya aduna pay purohan nga maluwas kay nakasul-ob na man daan.

Mahulog man gud sa walay kapuslanan kanang safety demonstration sa mga flight attendant sa dili pa molupad ang eroplano kay dili man dayon kana mahinumduman sa mga pasahero labi na kon matarantar na kon dunay masinati nga aberya sa kahanginan.

Weird man seguro nga imahinasyon apan duna baya kini basehan kay simbako mahitabo ang gikahadlokan andam na ang tanan.

Sama sa barko anaa ra sa ulohan sa teheras ang mga life vest, ang uban himoon man nga unlan sa mga pasahero.

Ang gagmay’ng sakayan ilabi na sa mga isla gi-require na man gani nga magsul-ob og life vest aron kon matikyaob molutaw ra man dayon. Apan ang mga pasahero man gud taas kaayo og confidence level, o gahi lang gyud og ulo nga dili motuman apan dali ra ba kaayo mag-panic.

Sama sa nihitabo didto sa Olango Island nga nanglayat ang mga pasahero dihang nasudlan og tubig ang pumpboat tungod sa kadagko sa balod.

Wala sila makasul-ob daan og life vest, maayo na lang kay duol na sila sa pantalan ug naluwas tanan.

Ma eroplano o barko man, malikayan ang panic kon dunay problema motumaw kay nakaandam na man daan.