Mayweather mi-walkout
CEBU, Philippines — Nabuhi og balik ang gihandum nga 'rematch' nilang Manny Pacquiao ug Floyd Mayweather Jr. human sa impresibong kadaogan sa Pinoy boxing icon batok ni Lucas Matthysse.
Si Pacquiao mipatikangkang ni Lucas sa ikapitong hugna aron pagsakmit sa WBA welterweight title niadtong Hulyo 15 didto sa Axiata Arena sa Kuala Lumpur, Malaysia.
Mirespeto og maayo si Mayweather ni Pacquiao ug gani iya kining gipahalipayan sa kasagaran sa iyang mga interbiyu.
Apan daw sa napikon si Mayweather sa dihang gisukitsukit og maayo kon gusto pa ba siyang makig-away og balik ni Pacquiao.
Sa dihang nahinabi sa All Urban Central YouTube, makita nga sa dihang gipangutana siya kabahin sa potensiyal nga 'rematch' sa Pinoy niyang karibal, makita nga si Mayweather mitalikod og kalit sa mga tigbalita.
Si Mayweather mipilde ni Pacquiao sa una nilang away niadtong Mayo 2015 didto sa Las Vegas nga mikulit og rekord isip labing dako nga away sa kasaysayan sa boksing.
Sa iyang bahin, si Pacquiao nagkanayon nga dili na angayan pang disturbuhon karon si Mayweather kay retirado na man kini.
Motuki lamang siya og 'rematch' kon ugaling makahukom si Maywather nga motikang og balik sa nataran sa boksing.
- Latest