Pagbaha sa kuwarta sa ABC

Niduaw sa Arangkada sa DYAB Abante Pa, Bisaya! ang pipila ka barangay kapitan sa Dakbayan sa Sugbo aron pag-angkon nga gitanyagan sila og tagsa ka milyon ka pesos aron pagpadaog sa usa sa mga magpapili pagka presidente sa Association of Barangay Councils (ABC) Cebu City Federation karong Hulyo 30.

Nitingog sila sa radyo aron pagpasalig sa mga molupyo sa ilang mga barangay nga gisalikway nila ang suburno ug magpabilin silang matinud-anon sa ilang grupo. Kay di man nila nganlan ang mga nitanyag sa kuwarta, di sab nako sila nganlan ni ang ilang gipasanginlan.

* * *

Apan tugoting akong pakisaw-an nimo ang talagsaong mga sugilanon nga ilang gitug-an nako pagkahuman na sa programa gahapon sa buntag:

• Usa ka kapitan nga naila sa iyang gugma sa big bikes gida sa tindahan sa labing mahalong mga motorsiklo sa Dakbayan sa Mandaue, gihatagan og yawe sa naibgan niyang modelo ug gidasig sa pagsakay na ini kay sila na lang ang moda sa karaan niyang motorsiklo balik sa iyang bay;

• Laing kapitan nga nikomedya nga ganahang makig-date og guwapang artista gipahunat ug gipasaligan nga dad-on gyung artista dinhi sa Sugbo;

* * *

• May kapitan sab nga giadto sa iyang bay ug giladlaran og Singaporean dollars nga balor og P250,000 isip pasiuna sa usa ka milyon ka pesos nga ihurot og hatag dayong eleksiyon; ug

• Ang mga kapitan ug kanhi kapitan sa karibal nga grupo nga agresibong nangumbinsir nila gisaaran og komisyon nga P200,000 sa matag kapitan nga makumbinser sa pagbalitok.

* * *

Nahibaw-an nila nga pipila na lang ka kapitan ang wa pa maduol. Wa sila kahibawo pila sa mga niduol ang nibalibad ug pila ang natintal na. Nakumbinsir sila nga tinuod gyung may daghang kuwarta nga ipanghatag ug di kutob lang sa estorya ang panghaylo.

Nakuryuso sila nga kon tagsa ka milyon ka pesos ang gitanyag sa matag usa sa ilang pundok pila kaha ang gitanyag sa mga kapitan sa karibal nga grupo? Nagkomedyahay sila nga kon ang gipasalig sa ilang mga karibal P200,000 ra, sama sa madawat sa mga nangumbinsir nila, mahimong daghan ang makahunahuna sa pagbalitok sa ilang grupo aron nga makadawat sab og tagsa ka milyon ka pesos. ([email protected])