Illegal gambling na sab ang kampanyahi

Nalipay ko nga ang kapolisan mihimo og dinungan nga operation sayo kagahapon sa kaadlawon batok sa mga tigpayuhot og ilegal nga drugas ug misangpot sa pagkamatay sa daghang drug pushers nga misukol.

Moyukbo ko sa kapolisan sa inyong gihimo nga kampanya. Salamat kaayo PNP Regional Director Debold Sinas, ug sa imong mga opisyal sa mga siyudad sa Talisay, Mandaue, Lapu-Lapu ug Cebu City.

Kinahanglang himoon ninyo kanunay ang ingon niadto nga operation aron nga magkurog na kining mga tawo nga nalambigit sa pagpayuhot og gidiling drugas.

*  * *

Kanindot kaha kon ingon usab niini ang himoon sa kapolisan batok sa mga tawo nga nalambigit sa ilegal nga sugal. Mahimo ba kini sa atong mga polis Chief Superintendent Sinas?

Kon himoon sa kapolisan ang dinungan nga kampanya batok sa mga nalambigit sa ilegal nga sugal, sama sa video karera, moli-moli ug illegal swertres, paminaw ko daghang mga opisyal sa barangay ang mokurog.

Nganong dili man sila mokurog nga daghan man nga opisyal sa kabarangayan ang nag-finance og illegal swertres.

Sigurado ko nga ang mga sakop sa Regional Special Operations Group (RSOG)-7 nasayod gyud kon kinsa ang opisyal sa Barangay Kamagayan nga nag-operate og illegal swertres human nila madakpi ang usa ka tanod sa maong barangay.

Wala ba gyud mahibulong ang kapolisan nganong walay kampanya ang mga polis sa lainlaing stations sa mga illegal gambling? Kon imong pangutan-on, moingon dayon ang mga polis nga wala nay illegal gambling machines sa ilang lugar.

Apan tan-awa, sa kinalit nga pagronda sa mga polis didto sa Talisay City kagahapon, daghang video karera machines ang nasakmit. Unya, unsa may inyong ikasulti ron mga polis diha sa Talisay?

Dinhi sa dakbayan sa Sugbo, maayong pangilisan ang tanang polis diha sa Station 6, kay nagduda gyud ko nga nagdawatan sila og suborno gikan sa mga tigpasiugda og ilegal nga sugal ug mao nga wala sila mohimo og operation batok sa mikatap nga video karera, moli-moli ug illegal swertres sa ilang teritoryo.

Nagpareho lang ning mga polis sa Station 5 (Carbon), Station 3 (Waterfront) ug Station 6 (Sawang Calero) nga wala gyud mohimo’g mga raid sa mga illegal gambling.

Daghang illegal gambling machines ang anaa sa Barangay Tejero ug Carreta, apan gipasagdan ra kini sa Station 3, samtang ang Station 5, nangiyugpos ra sab sa mga illegal nga pasugalan sa Ermita, ug ang Station 6, gipasagdan ra ang illegal nga mga sugal sa Suba ug Pasil.

Pagka karon, nag-compile pa ko sa daghang report nga miabot nako. Naay operator sa illegal swertres sa F. Rallos Street, wala mo kaila?