Tanom pang-abog sa lamok (3)

Lemon balm — Ang halangon nga baho niining maong tanom paborito kaayo nga panibaan sa mga buyog, apan sa mga lamok, lihay kaayo sila niini kay hadlok nga basi’g mamatay sa baho, o sa alimyon niining bulak sa lemon balm. Liboan na ka tuig sa karaang panahon, sumala sa Herbs Society of Amerika, gigamit kini nga tambal ug panglamas, ug sayon ra ni patuboon isip pangontra sa lamok.

Marigold (ahito o marabilya) — Maisip kini nga magbalantay sa mga harden, aron dili dugokan, o puy-an sa mga insekto sama sa lamok. Segun sa University of Arizona’s Coop Extension, gihimo ni sa mga hardenero nga mesitas sa panimalay aron wa’y lamok nga magsauysaoy nga manuslok sa sulod ug sa palibot.

Ang katahom sa bulak niini, makadani apan makapaidlas kini niadtong mga insekto nga mamahitay, o manuslokay sama sa lamok.

Lavender — Ang kahumot niini, dili lang nindot nga hanggapon, makapang-abog sab kini sa mga insekto, labi na sa mga lamok. Swerte kaayo ni nga sa tibuok panahon sa ting-init, mamuliskad kanunay ang mga bulak nga tugob sa katahoman aron hapsayon ang atong panghunahuna.

Catnip (catmint o katmint) — kon mahigugmaon ka sa iring unya kontra ang lamok, iprayoridad ang pagtanom niini sa imong harden. Bisa’g dugay ni mangudlot, sagdi lang kay manaha ug molabong dayon ni ug manglayas ang mga lamok.

Bee Balm — mamulak usab kining maong tanom ug atraksyon kini sa mga buyog, kabakaba ug langgam nga siloy, apan ang lamok molihay sa iyang kahumot.