EDITORYAL - People’s initiative?

Susama ra gyud nga usa ka paghinangol sa katungdanan sa kagamhanan kining gihimo ni House Speaker Pantaleon Alvarez nga gusto  niyang walay eleksiyon nga ipahigayon karong sunod tuig base sa gilatid sa Konstitusyon.

Gigamit pa ni Alvarez ang termino nga “People’s Initiative” nga mao kuno ang ilang pagahimoon, aron mogawas nga gikan sa katawhan ang tinguha nga pag-uktaba sa piniliay, apan diay ang tinuod gikan ra sa mga opisyal nga hangol sa gahum.

Dili malalis nga kinabag-an sa katawhan, apil na ang kaliboan ka dumadapig ni Presidente Duterte, gusto nga mapahigayon na ang eleksiyon aron nga kahatagan og higayon ang mga tawo nga mailisan nila ang mga opisyal nga walay pulos.

Masabot gyud nga tinguha ni Alvarez nga sa usa ka bala, duha ka “langgam” ang iyang maigo. Kini mao nga dili sila makagasto sa pagpangampanya ug sa samang higayon, makapadayon sila paghupot sa gahum. Hinakog sa katungdanan.

Dili angay’ng yama-yamaan lang ang atong Konstitusyon nga himoan lang og kausaban sa dinalidali nga paagi, kay ang resulta niini, daghang balaod unya nga magkatuali lang. Angay ba nga tungod sa kahakog sa gahum ni Alvarez ug sa pipila niya ka kaalyado, usbon lang gyud ang atong Batakang Balaod?

Daghang mga opisyal sa kagamhanan nga wala gyud magserbisyo sa katawhan kay gihimo lang kini nila nga “sideline” kay ang uban dunay mga negosyo ug laing trabaho, ug panagsa ra gani nga moanha sa ilang opisina.

Kining maong mga opisyal mapalagpot lang sa katungdanan kon mahinayon ang eleksiyon kay ang katawhan dili na man mobotar pa kanila. Busa nganong gusto man ni Alvarez nga iuswag ang gikatakda na nga piniliay?

Angay’ng maminaw si Alvarez sa sentimento sa katawhan, ug dili kay mogamit sa pipila lang ka tawo ug ipatuo nga “People’s Initiative” ang pag-usab nila sa atong Konstitusyon.