Pag-awas sa lalis
Dihang gikuha ni Cebu City Mayor Tommy Osmeña ang traffic enforcers sa Cebu City Transportation Office (CCTO) gikan sa kadalanan duol sa underpass project sa Mambaling, Dakbayan sa Sugbo niadtong Lunes, daghang nabalaka sa kadaot nga namugna sa pag-awas sa lalis sa social media ngadto sa tinuod nga kinabuhi.
Ang wa’y kinutoban nga balikasay ug insultohay sa Facebook (nga tungod sa kasayon sa pagkomentaryo ug pagtago sa tinuod nga ngalan dako ang tentasyon sa pagpatuyang) mahimong laktawan, o i-ginhawa lang og lawom. Apan ang aktuwal nga pagkatanggong sa trapiko nakahatag og tinuod nga kahasol.
* * *
Makapaalarma (bahala nga usahay makalingaw) ang tinawganay og ngalan nilang Mayor Osmeña ug Regional Director Victor Caindec sa Land Transportation Office (LTO) sa Central Visayas ug sa ilang mga dumadapig. Apan dili makausab sa atong inadlaw nga kalihokan.
Apan ang kalit nga pagdawat ni Osmeña sa hagit ni Caindec ug ang wa pagpaundayon ni Caindec sa panganti sa mas epektibong pagdumala sa trapiko sa Mambaling, nakatanggong sa kaliboan ka motorista ug pasahero, nakalangay sa ilang mga lakaw ug nakadaot sa ilang mga patigayon ug panginabuhi.
* * *
Maayo na lang nga gipabalik dayon ni Osmeña ang traffic enforcers human sa tibuok adlaw nga pagpalta. Hinaot nga dili na niya isakripisyo ang interes sa mga Sugbuanon aron lang paghatag og leksiyon sa mga mangahas sa pagpanaway niya.
Sa pikas nga bahin, hinaot nga dawaton na lang ni Caindec ang mga pagsaway batok sa iyang buhatan, ug inay mosumbalik pagtulisok sa mga nanaway niya (labi na kon nag-apelyido og Osmeña), angay’ng isipon na lang nga hagit pagpalambo sa iyang pangalagad.
* * *
Hinaot nga ang ilang lalis sa social media makapatumaw sa labing mapuslanon nga mga sugyot base sa kasinatian sa mga nangapil ug mosangpot sa mas maayo nga pagtuman sa mga gimbuhaton nilang Osmeña ug Caindec.
Ug hinaot nga ang pagpanaway ni Osmeña makaaghat ni Caindec pagpaspas sa langay nga mga transaksiyon sa LTO ug ang pagpanaway ni Caindec makahagit ni Osmeña pagpatuman sa mas epektibong mga sulbad dili lang sa trapiko sa Mambaling, kon dili, sa tibuok dakbayan ug sa wa’y hubas-hubas nga mga baha ug mataligam-an gihapon pagkolekta nga mga basura.
* * *
- Latest