Duterte mora’g durian
JAV, BANATI! - Javier Tapulado (Banat) - July 17, 2018 - 12:00am

Daghan ang dili mokaon og durian, kay sa baho pa lang mokulismaot na ang nawong. Haskang nakapanampong sa ilong. Unsaon, lud-on gyud kuno sila sa inalisngaw sa maong prutas nga paborito sa mga tsikboy, kinsa mokaon gyud og toda niini kon may nagsingabot nga dakong gubat sa kama, kay matud pa nila, “once tested, you always want it.”

Alang nako ang kinaiya ni Duterte, kaamgid sa prutas nga durian sa Davao.

Si Tatay Digong, kon modiskurso atubangan sa publiko, mora gyud og mga dagkong tunok sa durian ang pulong nga manggawas sa iyang baba.

Hait ug ngilo paminawon alang sa mga tawong nangaigo. Apil na niini ang iyang pagpamalikas nga sagad adunay sense of humor. Daw manggitik sa makadungog, pero may unod!

Gisaway ang binugoy niyang sinultian sa iyang mga kontra sa politika, gigamit ang simbahan ug binayrang raliyesta aron mahugno ang administrasyon ni Tatay Digong kay nangyawat nga makabalik og bangon ang mga hipokrito gikan sa ilang pagkahagba.

Apan wala sila katarug. Nagpabiling solido ang mga diehard supporters sa pangulo ug andam manalipod niya bisa’g ang pagbuhat sa ingon nagkahulogan og pagbuhis sa ilang kinabuhi. Ngano?

Tungod kay kon tan-awon nato ang nabuhat ni Duterte sa duha ka tuig niyang pagpamunoan sa atong nasod, atong makita nga nagmatinud-anon siya sa iyang War on Drugs, diin hasta public servants, gikan sa gamay ngadto sa dako, kinsa miapil og dula sa mga kalihokan sa illegal drugs, gipanguyawan kay basi’g sila na ang isunod nga ma-front page sa mga mantalaan.

Ang mga kurap nga government officials, basta nasakpang may anomaliyang gibuhat, bisa’g suod pa niyang higala, dihadiha, iyang gipapha.

Usab, ang mga proyekto nga sa miaging mga presidente dugay na nga nasugdan apan wala gyud nila makompleto, sulod sa hamubong panahon nahuman dayon kini dihang si Tatay Digong na ang nakalingkod sa Malakanyang.

Pipila na ba ka mga kabus ang nakapahimulos sa iyang libreng hospitalization ug free education? Tinuoray, ang baba ni Duterte mora’g panit sa durian nga hilabihan katunokon.

Apan ang iyang kasingkasing nahisama sa unod niini nga kutob sa kinsa ang misulay pagtilaw mituaw: “It smells like hell but it tastes like heaven.”

RODRIGO DUTERTE
Philstar
  • Latest
Latest