Osmeña vs. Caindec

Gisaway ni Mayor Tomas Osmeña ang Land Transportation Office-7 tungod sa kalangay niini sa pagpangrehistro sa mga sakyanan, ilabi na sa mga motorsiklo.

Apan gisaway usab ni LTO-7 Regional Director Victor Caindec ang mayor tungod sa pagpanghilabot niini sa trabaho sa LTO. Gani giawhag ni Caindec si Mayor Osmeña sa pag-atiman lang sa iyang trabaho sa dakbayan, ug iapil ang LTO sa pagpamolitika.

Tungod sa kalangay sa pagpangrehistro, sama ra sa gisilotan sa LTO ang mga nanag-iya og motorsiklo hinungdan nga pasakaan sa mayor og kaso ang LTO.

Apan gipasanginlan usab ni Caindec ang kagamhanan sa dakbayan sa Sugbo nga napakyas sa pagparehistro sa daghang sakyanan sa siyudad. Gisaway usab ni Caindec ang mayor tungod sa kapakyas niini pagsulbad sa grabeng trapik sa dakbayan.

Gidepensahan ni Caindec ang kalangay sa iyang buhatan sa pagpangrehistro sa mga motorsiklo kay kuno maoy ilang giuna sa pag-atiman ang pag-isyu sa driver’s license. Kay nganong unahon man kuno nila sa pag-atiman ang pagpangrehistro sa mga motorsiklo nga makapasamot ra man kini sa suliran sa trapiko sa dakbayan?

Gihagit pa ni Caindec ang mayor sa pagkanaog sa iyang pwesto kon iyang masulbad ang suliran sa trapiko. Tungod sa bangi nilang Caindec ug Osmeña, sugod kagahapong adlawa gikuha ni Osmeña ang 16 ka traffic enforcers nga nadestino sa Natalio Bacalso Avenue.

Ang bangi sa duha, resulta sa akop-akopon nilang personalidad. Si Mayor Osmeña mora’g gustong mag direktor sa LTO, samtang si director Caindec gusto usab nga magmayor. Tungod sa away sa duha, nadamay ang publiko, butang nga dili maayo.

Awhag nako ni Osmeña ug Caindec, ayaw ninyo idamay ang mga tawo nga walay labot sa inyong away. Bahala’g magsumbagay mo, ayaw lang ninyo idamay ang publiko.