Murder capital?
Sa mga sunodsunod nga pagpatay dinhi sa Dakbayan sa Sugbo sa niaging mga adlaw, daghan ang nabalaka nga dili na safe ang siyudad. Mismo si Mayor Tomas Osmeña ang mipadayag usab sa iyang mga kabalaka sa pagkahagba sa sitwasyon sa kahusay ug kalinaw sa atong lugar.
Dili tiaw ang mga dugoong panghitabo sa niaging semana. Adunay usa ka adlaw nga tulo ka kinabuhi ang nakalas, lakip na ang usa ka bata kinsa naigo sa saag nga bala atol sa operasyon sa kapolisan batok sa upat ka tawong giingon nalambigit sa ilegal nga drugas sa Barangay Ermita.
Lakip usab sa mga napatay sa mga pagpamusil mao ang usa ka konsehal sa Barangay Kalunasan ug kanhi konsehal sa Barangay Lorega San Miguel. Ang mga biktima giingong nalambigit kaniadto sa negosyo sa ilegal nga druga.
Bitaw makaduda usab kining mga pagpatay sa Dakbayan sa Sugbo ug ubang lugar sa probinsiya.
Kini tungod kay kasagaran sa mga biktima nalambigit man sa ilegal nga drugas. Gani kadtong mga pulis dinhi nga gipangluthang dili pa dugay niapil usab kuno sa maong ilegal nga negosyo.
Daghan hinuon ang nagduda nga basin kon binuhatan sa otoridad kining mga pagpatay sa mga nalambigit sa druga. Ug nga kabahin kini sa paghuwis de kutsilyo niadtong mga badlongon niining gihingusgan nga kampanya sa kagamhanan batok sa druga.
Siguro basin hugaw ra usab ang hunahuna sa uban. Kay kini laging naanad na kita nga makadungog og mga akusasyon batok sa kapolisan nga mao kuno ang milampas sa mga sagbot sa katilingban kinsa wala gayud miundang sa ilang negosyo sa druga.
Gani mismong si Presidente Rodrigo Duterte ang mibahad man niadtong mga nalambigit sa druga nga sementeryo ang ilang padulngan kon dili gayud sila mohunong. Mao usab kini ang warning sa bag-ong direktor sa kapolisan sa dakbayan sa Sugbo.
Hinuon dili usab maayong tilimad-an kining mga pagpatay dinhi sa Sugbo. Dako kini og epekto sa imahe sa siyudad ug sa kinatibuk-ang probinsiya. Kay basin unya kon hinayhinay na ang atong lugar nga mamahimong “murder capital” sa Pilipinas.
- Latest