Krimen para balaod militar?

Tungod sa iyang agi dihang mayor pa siya sa Dakbayan sa Davao, diin gipanghipos pinaagi sa pagpatay ang mga badlongon, tunog kaayo ang pangalan ni Presidente Rodrigo Duterte.

Tungod sa matang sa disiplina nga iyang napatuman isip mayor sa Davao, misikat si Duterte. Nahimong sumsoman sa mga tawo ang iyang ngalan. Tungod kay uhaw na ug napul-an na sa kakuwang sa disiplina ang kinabag-an sa mga Pinoy, gisuportahan ug giduso sa katawhan ang kandidatura ni Mayor Duterte sa pagka presidente sa nasud.

Ang mga dumadapig sa mayor naglaum nga sa pagka presidente ni Duterte, madisiplina na ang katawhan ug mahatagan na og kasiguroan ang ilang kinabuhi ug kabtangan.

Apan human sa duha ka tuig nga pagka presidente ni Duterte, daghan na man hinuon ang gipangpatay sa bisan asa nga dapit sa nasud.

Kaniadto lang miaging semana, duha ka mayor ug usa ka bise mayor ang gipatay.

Dinhi sa Sugbo, nahimong dugoon ang adlaw nga Martes human nga gipusil sa mga polis ang tawong gidudahan nga adunay dautang tuyo ni Arsobispo Jose Palma sulod mismo sa Archbishop Palace compound.

Ning maong adlaw, gipatay usab atubangan mismo sa mga barangay tanod ug sa barangay hall sa Kalunasan, Dakbayan sa Sugbo, nga usa ka kanhi polis ug bag-ohay lang napili nga konsehal sa barangay.

Ang mga kontra sa politika nagtoo nga ang sunod-sunod nga mga krimen paingon na kini sa pagpaubos ni Presidente Duterte sa tibuok nasud ubos sa balaod militar. Kon imong tutokan pag-ayo, layo ra sa gituohan sa mga kontra sa politika ni Presidente Duterte ang sagunson nga patay tungod kay managlahi ang mga hinungdan sa mga pagpatay. Busa, dili pattern ug dili tumong sa mga pagpatay ang paghimo niining rason aron mapakanaog ang balaod militar sa nasud, kon martial law.

Hinuon, gikinahanglan nga ang mga krimen sulbaron gayud sa labing dali nga panahon ug dili lang baliwalaon aron dili maanad sa paghimo og krimen ang mga kriminal.