Pacquiao mipasalig away nilang Matthysse madayon
CEBU, Philippines – Madayon ang away ni Manny Pacquiao batok ni WBA welterweight champion Lucas Matthysse karong Hulyo 15 didto sa Kuala Lumpur, Malaysia bisan pa man sa mga hugon-hugon nga lagmit madiskaril kini. Sa text message ngadto sa Philstar.com, ang adviser ni Pacquiao nga si Michael Koncz nagkanayon nga ang Pinoy ring star mismo ang mipasalig niini.
"Our fight will push through as I spoke to Manny an hour ago," matud pa ni Koncz.
Sa nangaging mga adlaw, dunay mikatap nga mga balita nga ang away nameligro nga dili mahinayon gumikan sa kakuliang pinansiyal.
Base sa pamahayag ni Dan Rafael sa ESPN.com, ang MP Promotions ni Pacquiao nga maoy nag-promote sa maong event, kuwang pa og $2 million nga pundo nga gikinahanglan alang sa maong pasundayag.
Matud pa ni Rafael nga usa na ka bulan ang milabay sukad si Pacquiao nakapalta sa deadline aron paghatag sa kuwang nga kuwarta. Ang MP Promotions igo lamang nakahatag og pasiunang bayad nga $500,000 ngadto sa kampo ni Matthysse ug event co-promoter Golden Boy Promotions.
Wala hinuon giklaro ni Koncz ang pinansiyal nga kahimtang sa promosyon, apan mipadayag siya og tumang pagsalig nga hapsay ang dagan sa tanan.
- Latest