Kon labayon og bato, basli og bala

Bisan pa man og pari sila, apan yanong tawo ra gihapon sila nga madutlan sa bisan unsa nga hinagiban, ug labaw sa tanan, adunay kamatayon. Gani, ubay-ubay na nga mga pari ang gipangpatay ug nagpabiling misteryo ang nagpaluyo sa ilang kamatayon.

Lahi ra man gud paminawon, o mora og talagsaon alang sa uban kon makadungog nga adunay pari nga gipatay, tungod lagi kay alagad man sila sa simbahan. Balaan ang pagtan-aw kanila sa uban sanglit representante man kuno sila ni Hesukristo.

Apan lahi na ang panahon karon kay wala na’y gipili ang mga kriminal, ma pari man, o ma polis, basta interesan nila seguro gyud nga moligdas. Dunay tinguha ang ubang mga pari nga mohupot og mga armas tungod kay nasuta nila nga target na usab sila sa mga kriminal.

Apan alang sa mga tradisyonal ug konserbatibo, dili kuno angayan nga maghupot og armas ang mga pari kay sila kuno balaan. Unsa man, bibliya na lang gyud ang dad-on nga armas sa kaparian?

Pwede man, apan mao lagi nga ang ubang pari nga bugoy bugoy basin sukipan ug armas ang gidalang bibliya. Moingon man ang mga pari nga dili sila mahadlok mamatay, apan ang tinuod kutob ra na sa baba kay luyo nianang ilang pulong, ang kahadlok sa kamatayon tungod kay tawo ra man usab sila.

Kamatuoran niini, adunay daghang pari ug pastor nga nagproseso alang sa paghupot og armas de fuego. Bitaw, kon makaayo ug makahatag nila sa kasegurohan nga mapanalipdan ang ilang kaugalingon pinaagi sa paghupot og armas, nganong hikawan man sila?

Sama sa ubang hut-ong, tugotan ang tanan sa paghupot og armas apan seguraduhon nga responsable niini kay basin kon mosangpot na hinoon sa mas grabe pa nga problema.

Kutob na lang sa pulong ang giingon nga kon labayon ka og bato, baslan nimo og pan, kay ang reyalidad karon mao nga kon labayon ka og bato, baslan nimo og bala.