EDITORYAL - Anti-tambay dili na bag-o

Dili na man bag-o kining pagdili sa mga estambay diha sa kadalanan aron luwas ug hapsay ang publikong lugar gikan sa mga kasamok ug hulga sa krimen tungod kay niadtong dekada 70 pa, aduna na man niini dihang gipatuman ang Martial Law.

Gawas pa niana, may mga ordinansa na man ang kalungsoran ug siyudad bahin niini. May vagrancy law usab nga sikupon kadtong mga tawong naglaruylaroy sa kadalanan nga wa’y mga tumong. Apil niini kadtong mag-estambay lang nga baskog pa ang mga lawas, apan wala gyud manarbaho, kadtong mga nagsugal ug naghuboghubog diha sa dalan.

Apan tungod sa mga prayoridad, nataligam-an ang implimentasyon niini. Dili na man unta kinahanglan nga mga polis gyud ang molihok para niini, tungod kay mahimo ra man kini sa mga barangay tanod. Ang kalainan sa kampanya karon, kon itandi kaniadto, mas seryuso ang programa karon. Kadtong madakpan ipaubos sa ‘profiling’ diin kuhaan sila og hulagway, pangalan, address, edad ug uban pa.

Ang Cebu City Police Office (CCPO) motutok sa mga barangay nga taas ang crime rates sa pagpatuman sa anti-loitering directive ni Philippine National Police (PNP) Director General Oscar Albayalde. Nag-una sa mga barangay nga tutokan kadtong mga barangay nga naghitak ang ilegal nga drugas kay ang mga dapit nga daghan og ilegal nga drugas, naa usab diha ang daghang estambay ug mga badlungon nga kanunay’ng makakita og away ug makaamong sa mga tarong nga mobadlong kanila.

Kon ang tumong sa kapolisan sa pagkampanya batok sa mga estambay para sa kaluwasan ug kalinaw sa komunidad, sigurohon lang gyud nga wala silay matumban nga tawhanong katungod. Dili unta kini gamitong pamaagi alang sa ilang personal nga interes, o kayugot ngadto sa usa ka tawo. Angay nga magmatngon kining mga estambay nga nagtuong sila’y hawod sa ilang lugar tungod kay usa lang ka tawag ngadto sa kapolisan, posibleng sa prisohan sila mapunta.