Ting-uwan na gyud

Paglabay sa usa ka semana gikan sa pagdeklarar sa PAGASA nga  ting-uwan na, niabot na gyud. Gani, sa atong pagsuwat niini, nisugod na’g uwan. Lagmit mi-sit in na gyud tingali ang wet season.

Hinumdoman nga sa naghinapos ang buwan sa Mayo, nag-uwan-uwan, apan giingnan kita sa PAGASA nga dili pa kadto wet season. Mihunong ang uwan, sa ato pa, nakatag-an ang PAGASA.

Apan sa miaging duha ka semana, ambot unsa tong adlawa, miuwan na usab, ug niining tungora, ang PAGASA miingon nga officially mi-sit in na ang wet season, ting-uwan na gyud.

Apan, a day after sa pag-declare sa PAGASA nga ting-uwan na gyud, wa na hinoon mouwan, hangtud sa hapon sa Domingo.

Unta ilang i-qualify nga asang dapita sa nasud ang ting-uwan, naa ba sa Manila ug Mindanao, apan ting-init pa sa Central Visayas particularly sa dakbayan sa Sugbo, o sa Metro Cebu. Mao kini ang nahitabo sa niaging semana. Porbidang inita dinhi sa ato.

Nganong PAGASA may atong gingalan sa weather bureau nga dili man kuno ni maasahan? Kadtong Ruping pananglitan, sa akong nahinumdoman, walay tukmang pasidaan nga ingon niadto kabangis ang maong bagyo.

In fact, kaadlawon na nga mihaguros si Ruping. Earlier, during the night, wa gyuy timailhan nga dunay taliabot nga kusog nga bagyo. Walay panic buying nga nahitabo pangandam sa bagyo. In our case, maora’g unom ra ka latang sardinas ang among gipalit, ug usa ka loaf of bread.

Hinoon niadtong panahona, dili pa modern ang kahimanan ang weather bureau. Sa ato pa, ma-excuse sila. Apan, karon, ila na man lang kitang lingaw-lingawon sa mogula sa ilang computer.

Kahinumdom sab ko nga bisperas gyud sa piyesta sa Opon, gikuso-kuso kami sa bagyong Bob. Kon duna pa’y igong pasidaan, makapangandam usab unta kami. PAGASA?

* * *

Baskets of solutions.  Mao kini ang solution ni DOTr Secretary Arthur Tugade pagsulbad sa suliran sa trapiko sa atong dakbayan. Unsa kining maong baskets of solutions?

Actually, kining iyang giingon nga baskets of solutions, matud ni Mayor Tomas Osmeña, empty kuno, walay sulod ang iyang basket kay hangtud karon, wala pa siya makapakita, bisan ang basket na lang.

Alang kang Tugade, ang BRT dili maoy solution sa traffic problem sa atong dakbayan. Wala kini masulod sa iyang baskets of solutions.

Hinaot nga ma-identified ug ma-implemented unta sa labing dali nga panahon kining iyang giingon nga baskets of solutions, sa dili pa mo-imposible ang kasulbaran ning maong problema.