Wala gyud makasabot

Daghan ang wala kaayo makasabot kon nganong angay gyud nga kampanyahan ug ipahunong kining illegal swertres nga mikuyanap pag-ayo sa bisan asa nga dapit, apil na dinhi sa Dakbayan sa Sugbo.

Bisan ang mga pobre nga makabenepisyo unta kon mahanaw kining mga illegal swertres operations, wala makatugkad sa tinuod nga isyu.

Kadtong mga kusog mopusta og swertres, igo ra silang miingon nga ganahan sila sa illegal swertres kay barato kon itandi sa swertres sa Philippine Charity Sweepstakes Office.

Ang wala nila mahibaw-i nga ang PCSO maoy usa sa gikuhaan og pundo sa kagamhanan nga magamit sa Malasakit Program nga gipasiugdahan nila ni Presidente Duterte ug ni Special Presidential Assistant Bong Go aron pagtabang sa mga pobre nga masakiton.

Dinhi sa Sugbo, kadtong gusto nga mo-avail sa Malasakit Program, mahimong moanha ra sa Vicente Sotto Memorial Medical Center (VSMMC) aron mapahimuslan nila ang libre nga serbisyo.

Tinuod, ang illegal swertres mas barato ra ug dagko ang kantidad nga madaog, apan ang madato niini mao ra ang mga tigpasiugda sa maong ilegal nga sugal.

Ang mga pobre angay gyud unta nga dili mo-patronize sa maong illegal swertres operation kay aron modako ang matigum nga kantidad sa PCSO nga magamit sa Malasakit Program.

Nagpakabana gyud ko niini tungod kay programa man gud ni Presidente Duterte ang pagtabang sa mga kabus nga walay ikabayad sa ospital. Kapila na nako gibalikbalik nga ang akong maguwang apil sa nakapahimulos sa programa ni Duterte dihang mayor pa siya sa Davao.

Wala gyud mi nabayran, bisan gamay, sa pagka-admit sa akong maguwang didto sa labing dako nga ospital sa kagamhanan sa Davao diha nga mayor pa si Duterte, ug sila si Bong Go maoy nagtabang kanako.

Kini maoy rason nga gusto nakong hugtan gyud ang kampanya batok sa ilegal nga mga sugal. Apan unsaon, klaro kaayo nga nagkiyugpos lang ang kapolisan ug wala gyud kaayo mohimo’g kampanya batok sa ilegal nga sugal.

Sayonan ka nga ang report nga akong nadawat, pwerteng pagdagsang sa illegal swertres dinhi sa dakbayan, apan nakadungog ba gud kamo nga may gipangronda nga financier?

“Open secret” na kon kinsa ang uban sa mga financier sa illegal swertres nga naglangkob sa mga opisyal sa barangay, apan gihimoan ba gud sila og operation sa mga polis?

Ayaw ko’g ingna nga wala masayod ang kapolisan kon kinsa ang mga financier dinhi sa ato. Nahibawo man gani ko, ang kapolisan na kaha?