EDITORYAL - Balit-ad nga inpormasyon

Sayop ang inpormasyon nga miabot kang Mayor Tomas Osmeña, apan mitoo dayon siya ug abtik kaayo nga nakahukom sa pagbungkag sa kontrobersyal nga V-Hire Terminal sa Barangay Kamagayan ning Dakbayan sa Sugbo. Dili malalis nga lantip kaayo og pangisip si Mayor Osmeña, apan ning puntoha mitoo ra siya sa usa lang ka bahin nga posibleng gisulti sa mga sakop sa Barangay Mayor’s Office (BMO) sa Kamagayan.

Karon, daghang pasahero nga sumasakay og V-Hire nga magpanawan sa habagatan ug kasadpang bahin sa Sugbo ang apektado, kay dili na tugotan ni Osmeña nga makapadayon pag-operate ang V-Hire Terminal diha sa Kamagayan. Gitug-an sa mayor ngadto sa mga reporters nga ang iyang nasuk-an kay ang nagdumala sa terminal nga si Douglas Labra wala motugot nga ang sakyanan sa BMO maka-parking sa terminal. Gihulagway kini sa mayor nga paghawod-hawod ug ingon sa gustong ipatuo ni Labra nga siya ang hari sa terminal.

Apan balit-ad diay ang nahitabo. Nagkalalis sila si Labra ug ang nagdumala sa BMO sa Kamagayan kay nangasuko sila dihang gitugotan ni Labra nga maka-parking sa iyang sakyanan sulod sa terminal ang usa sa mga abogado sa mayor. Angay gyud unta nga kuhaan usa ni Osmeña ang pikas habig sa dili pa siya moluwat og hukom. Matud sa mayor nga gimando na niya nga wala na’y V-Hire Terminal diha sa Kamagayan.

Kining maong kalamboan nahitabo samtang ang Ombudsman mipatubag na sa mayor kabahin sa gipasaka nga kaso sa mga konsehal sa oposisyon nga mikuwestyon sa pagtugot nga maka-operate ang V-Hire Terminal diha sa Kamagayan nga matud pa nakasupak sa mga lagda sa ordinansa, nga dili magbutang og terminal sa mga sakyanan duol sa mga tunghaan.

Tungod niining mao nga isyu, magkaguliyang na usab ang mga drayber sa pagpangita kon asa sila dapit maghimo og laing terminal, ug ang mga pasahero magkabuang na usab pagpangita kon asa sila makasakay.