EDITORYAL - Mga pari ang target?

Adunay himuong Senate inquiry sa umaabot nga mga adlaw aron pag-imbestigar bahin niining mga sagunsong mga pagpatay sa pipila ka mga miyembro sa kaparian dinhi sa nasud.

Dili naman maayo paminawon sa dunggan sa katawhan ang mga nahitabo karon. Mismo ang mga opisyal sa Malacañang nagduda nga gituyo kini sa mga “criminal elements” aron gubaon ang unta hinayhinay nga panag-uliay sa maayong relasyon sa gobiyerno ug sa simbahan.

Kinahanglan pa diay og Senate inquiries aron tutokan sa mga law enforcement agencies kining mga kasoha? Tulo na ka mga pari sa Romano Katoliko ang gipamatay sukad sa nilabay nga tuig, ang bag-o mao ang pagpatay sa pari sa Nueva Ecija nga si Padre Richmond Nilo niadtong Hunyo 10.

Ang mga mamumuno walay kahadlok pagkutlo sa kinabuhi sa alagad sa Diyos samtang si Padre Nilo nagpreparar pagselebrar sa iyang Santos nga Misa sa lungsod sa Zaragoza sa maong probinsya.

Matud pa sa kapolisan nadakpan na ang ‘primary suspect’ apan ang dakong pangutana karon kon mao ba gyud kining tawhana ang nagpatay ug kon ugaling siya, unsa man kaha gyud iyang motibo?

Niadtong Abril 29, ning tuiga gipatay usab si Padre Mark Ventura didto sa Cagayan human kini nagmisa ug niadtong Disyembre 5, laing pari usab sa Nueva Ecija ang gipatay nga si Padre Marcelito Paez.

Pila pa kaha ka mga pari ang kinahanglang makalas ayha molihok ang gobiyerno? Tinuod ba kaha ang pagduda sa Palasyo nga tinuyo kini aron moaslom og balik ang relasyon sa simbahan ug sa gobiyerno?

Tinuod, nga kritikal kaayo ang simbahan sa pipila ka mga palisiya sa administrasyon sama sa war on drugs ug human rights abuses.

Apan sa mga panghitabo karon, di imahe sa kaparian ang maguba kondili ang gobiyerno, ilabi na si Pres. Duterte kon magmika lang ang kapolisan.