EDITORYAL - Dili kalikayan nga manaktak

Mora’g nakapanglantaw na daan si Mayor Tomas Osmeña nga niining labing ulahi nga kamandoan sa Regional Tripartite Wages and Productivity Board nga nagpausbaw sa sweldo sa mga trabahador, mosangpot kini nga ang ubang kompaniya manaktak og pipila nila ka kawani. Gamay ra tuod kaayo ang usbaw, kay P20 ra gud ang kada adlaw, ug nangyamiid lang niini ang mga trabahador. Apan sa bahin sa mga negosyante ug mga agawon, nakapadugang kini sa ilang gastohan ug magping-it sila nga maghuna-huna nga maibanan ang ilang ganansiya.

Kon ang usa ka kompaniya adunay 100 ka kawani, sa usa ka buwan madugangan lang ang iyang sweldohan og dul-an sa P50 mil. Hinoon, kon ang usa ka kompaniya hinay sa negosyo, mahimong masabtan ra nga sila mabalaka sa epekto sa pagpatuman og usbaw sa sweldo.   Ang atong baruganan ning mao nga isyu nga kon ang usa ka kawani gutom, ug apiki sa iyang panggastos tungod kay kuwang ang iyang sweldo nga gastohon sa kamahal karon sa presyo sa mga palitonon, mahimong naglatagaw ang iyang utok samtang anaa sila sa ilang trabaho.

Resulta, dili maayo ang ilang performance, kon itandi niadtong mga kawani nga malipayon sa ilang sweldo ug mapahiyumon nga mituman sa tagsa-tagsa nila ka katungdanan. Kini maoy gipasabot sa mayor nga kon ang usa ka kompaniya manaktak og kawani aron mahimong patas ra gihapon ang iyang gasto, kadtong mga mataktak sa trabaho maoy labing pait ang kahimtang.

Apan kon ang usa ka kompaniya manaktak man gyud gani og ilang kawani tungod kay naapike na kaayo tungod sa nagpadayong krisis sa negosyo, kinahanglang hatagan gyud nila ang ilang mga kawani sa benepisyo nga gilatid sa balaod. Sa mga mataktak sa trabaho tungod sa krisis, angay’ng dili nila usikan ang mga pabawon nga ihatag kanila sa tagsa-tagsa nila ka kompaniya aron makasukad sila og bag-ong panginabuhi.