EDITORYAL – Gamay pang presyur batok sa China

Gikinahanglang witkan ni Pres. Duterte panagsa ang China diha sa West Philippine Sea apan dili kinahanglang putlon ang maayo niining relasyon sa higanteng nasud.

Ang Pilipinas maoy gibasol sa mga nasud tungod sa pagpadaplin niini sa desisyon sa International Tribunal maong nakapatuyang ang China sa ilang gipanghimo sa WPS.

Sa pamahayag ni Duterte atol sa ika-120 anibersaryo sa Philippine Navy didto sa Ternate, Cavite subling miesplikar ang pangulo sa rason.

Matud niya walay kapuslanan kon modeklarar og giyera ang Pilipinas batok sa China tungod kay dili gihapon makadaog. Kinahanglan ba diay og military confrontation? Nakasabot man ang mga Pilipino nga dili kini mahimo.

Way kwestyon sa kaisog ug abilidad kay mas eksperiyensyado ang mga sundalong Pilipino kon iparang sa mga sundalo sa China kay didto sa ilang nasud wala man silay insurhensiya. Apan kon basehan ang gidak-on sa ilang pwersa militar, layo kaayo ang tapad.

Ang gipangayo sa mga tawo mao nga matag aksyon unta sa China pagyatak sa soberiniya sa Pilipinas himoan dayon og seryosong aksyon.

Karon nameligro ang Pilipinas gikan sa mga bombers ug fighter jets sa China nga gibutang karon diha sa WPS. Kauban sa maong mga abyon ang kompletong support units gikan sa airbases hangtud sa naval bases niini sa maong lugar.

Pinaagi sa ilang mga kusog nga radars diha sa WPS ug sa airborne radars ma-detect na nila ang tanang mga abyon ug mga barko sa Pilipinas bisan kadtong bag-ohay pa lang nibiya sa mga air bases ug naval bases niini. Sa laktod pagkaestorya, nababoy nang daan.

Dili lang ang China ang interesado nga makontrol ang WPS tungod sa strategic importance niini sa major sea lanes ning bahina sa kalibotan.

Kaniadto pa doble-kara na ang China sa pakig-atubang sa Pilipinas. Ang pag-presyur sa China mahimo pinaagi sa pagduol ngadto sa ubang mga nasud lakip na sa tradisyonal nga kaalyado sa Pilipinas.