EDITORYAL – Kuyaw sa abuso

Sigurado na nga ang mga konsehal nga alyado sa Bando Osmeña Pundok-Kauswagan (BOPK) maoy mahimong mayoriya diha sa Cebu City Council pipila ka adlaw gikan karon kay madugangan man og duha ang ilang mga sakop.

Nangangkon na ang kadagkoan sa BOPK nga ilang mga kaalyado ang labing daghan sa mga nidaog nga barangay kapitan ug mga tsirman sa Sangguniang Kabataan (SK) sa kabarangayan mao nga sigurado na nga ang ilang alyado maoy makalingkod isip ex-officio member diha sa konseho.

Nindot kining maong kalamboan alang ni Mayor Tomas Osmeña kay bisan unsa’y gusto niya nga himoon, wala na may makababag kay iya na man ang mayoriya sa City Council. Ang mahimo na lang sa mga konsehal nga alyado sa Team Rama mao na lang ang pagbagutbot kon duna sila’y dili mauyonan.

Apan unta dili abusohan sa mayor ang pagka mayoriya sa iyang mga konsehal nga bisan unsa na lang unya ang iyang buot himoon bisan og dili na direktang makahatag og kaayohan sa kinabag-ang katawhan. Sama sa iyang gihimo kaniadto nga pagpahatag og hilabihan kadagko nga allowance matag buwan sa mga huwes nga nadestino sa dakbayan sa Sugbo.

Daghan ang wala makauyon sa gihimo ni Osmeña kaniadto nga kon pila ang sweldo sa huwes, mao usab ang kantidad sa City Hall allowance nga gipahatag niya sa mga huwes matag buwan kay aron kuno dili na makahunahuna pa ang mga huwes sa pagpangurakot. Pakyas si Osmeña kay bisan pa sa iyang gihimo, duna gihapo’y mga huwes nga gitaktak sa serbisyo kay giingong nanguwarta.

Nangangkon ang mayor nga daghan siya og mga proyekto nga wala dayon mapatuman kay gibabagan sa mga alyado sa Team Rama diha sa konseho. Apan karon nga ang BOPK na usab ang mayoriya, wala na’y makababag pa sa mga tinguha sa mayor, ug ang katawhan igo na lang sa pagpangindahay nga dili unta kini abusohan ni Osmeña.