Tabang sa kabus

Nagkalamanohay gyud sila si kanhi mayor Mike Rama ug Presidente Rodrigo Duterte didto sa Waterfront Hotel sa Barangay Lahug kaniadtong Domingo sa udto, apan wala gyud hinoon sila magkasultihanay.

Taudtaud gyud ang pagpaabot ni Rama kang Duterte didto sa lobby sa hotel kay miabot ang presidente, lapas na sa ala una sa hapon. Isyu gyud kon magkaduol sila si Rama ug Duterte kay ang kanhi mayor gihinganlan man sa presidente nga protektor sa drug lord.

* * *

Didto sab ko sa Watefront hotel niadtong Domingo kay mitambong ko sa press conference ni Secretary Bong Go, ang special assistant ni Presidente Duterte.

Kon may higayon ko, makigkita gyud ko ni Bong Go kon moanhi siya sa Cebu kay siya ang mitabang nako diha nga na-admit ang akong maguwang didto sa usa ka ospital sa Davao niadtong 2015.

Dili pa rehistrado nga botante sa Davao City ang akong brod niadtong higayona, apan gitabangan kini ni Bong Go ug Duterte, nga mayor pa niadtong higayona sa Davao. Wala gyu’y nabayran.

Kini maoy hinungdan nga mituo ko sa kanunay’ng isulti ni Bong Go nga si Duterte tinuod gyud nga mobati og kalooy sa mga manginahanglan og tabang kabahin sa problema sa panglawas.

Diha nga mayor pa si Duterte sa Davao, bisan ang dili lumolupyo sa Davao City, iyang gitabangan. Mao kini ang rason nga gimugna ni Duterte ang Malasakit Program, nga gigahinan og minilyon ka pesos nga salapi gikan sa nasudnong kagamhanan aron matabangan ang mga kabus.

Si Bong Go maoy gitugyanan ni Duterte pagsuperbisar nga mapatuman gyud kini ug kapahimuslan sa mga pobre. Dinhi sa Visayas, ang Office of the Presidential Assistant-Visayas (OPAV) maoy in-charge niining mao nga programa.

Dinhi sa Visayas, kapin na sa 13,000 ka pasyente ang natabangan sa Malasakit Program sukad kaniadtong Pebrero. Matud ni Bong Go nagplano sila nga palapdan ang programa nga Malasakit pinaagi sa pagbutang og pundo nga salapi sa usa ka ospital didto sa Tacloban aron adto na lang modangop ang taga Eastern Visayas.

Kadtong taga Sugbo, dangop mo sa Vicente Sotto Memorial Medical Center ug pangitaa ang in-charge sa OPAV diha. Karong bag-o lang, gitugyan ni Bong Go ang P50 milyones ngadto sa VSMMC aron magamit sa Malasakit Program.

Basta programa gani nga motabang sa pag-atiman sa panglawas sa katawhan, suportahan gyud nako kay mao kini ang gikinahanglan pag-ayo sa katawhan, sama nako nga nanginahanglan og maintenance. Pasalamatan gyud nako si Presidente Duterte ug si Secretary Bong Go.