Last election, prelude ba sa 2019 election?

Una sa tanan, atong hinumdoman nga sa 2016 elections, ambot pila lang ka barangay captain ang identified with BOPK, apan, wala kadto makapugong sa pagdaug ni Mayor Tomas Osmeña. Daghan ang natingala; ang uban nagtuo nga tikas ang maong eleksiyon.

Ug sa miaging barangay ug SK elections, samtang mayoriya gihapon ang oposisyon nga mga kapitan sa barangay, natingala na usab ang uban ngano nga mas daghang kapitan ug sakop sa SK nga identified sa BOPK ang nanaug’.

Prelude o pasiuna ba kining paghulagway sa 2019 elections? Mao ba gihapon kini ang mahitabo sa sunod tuig nga eleksiyon? Ilabina karon nga naangkon na sa BOPK ang mayoriya sa mga kapitan sa barangay?

Giingon nga molansar gayud si kanhi mayor Mike Rama sa sunod eleksiyon. Sa ato pa, padaplin lang una si Vice Mayor Edgar Labella, o mag-vice mayor lang gihapon, bisan tuod og siya ang chairman sa PDP-Laban sa dakbayan. Sa usa ka interview, si Speaker Pantaleon Alvarez, mi-acknowledge kang Labella nga maoy chairman sa local nga PDP-Laban. Nagpasabot  nga lagmit siya si Labella maoy iduso isip official candidate pagka-mayor sa PDP-Laban.

Maora’g layo pa ang 2019, apan, alang sa mga politiko, duol na kaayo. Hinungdan nga nagsugod na sila’g positioning.

Sa kaulohan naukay na ang Senado. Bisan pa sa iyang pagka-presidente sa PDP-Laban, si Senador Koko Pimentel gihuboan sa pagka-Senate President.

Indeed, anything can happen in politics.

* * *

Naunsa na gud tawon ang MCWD uy? Mao ra man og nagkagrabe na hinoon ang ilang problema. Kami diri sa Guadalupe, sitio Canaas in particular, tunga-tunga sa mga subdivision sa Guadalajara ug Buena Hills, mao ra man og gikastigo mi’g maayo sa MCWD.

Kon dili na nila kaya, mo-give up na lang unta sila. I understand, dunay mga private sector ang andam pag-take over. Kusog kaayo ang pagtubo sa dakbayan ug natural nagkadaghan ang nanginahanglan sa tubig nga dili na kasilbihan efficiently sa MCWD. Naapsan sila sa panahon. Dili na sila maka-cope sa kusog nga pag-uswag sa dakbayan.

Sa kapin na sa 20 ka tuig namong pagpuyo diri, wa gyud kahinumdom moagas ang among tubig during the day. Kasagaran tunga na’s gabii iagas. Unsa gud ning klaseha sa serbisyo?

Unya, abtik kaayo ni sila maningil. One time, wa mi kabayad on time kay wa mi kadawat sa bill, putol dayon sa tubig.

Duna pa ba kahay kahigayunan nga ma-improve ang serbisyo sa MCWD?