MLR hapit na maabsuwelto ni Duterte?

Hayag na ang dagway ni kanhi Cebu City Mayor Mike Lopez Rama human siya nakahigayon sa pagpakigsulti ni Presidente Duterte sulod sa duha na ka higayon, una didto sa Davao ug ang ikaduha niadtong duha ka adlaw nga pagbisita sa Presidente dinhi sa Sugbo.

Kon kahinumduman, dugay nga panahon nga nagpaabot ang kanhi mayor sa Sugbo nga makasulti personal ang Presidente human siya pasanginli niini nga drug protector. Apan ang presidente wala gayud mohatag og kahigayonan nga magkasulti sila ni Rama.

Pero bisan pa man sa kaidlas sa presidente ang kanhi mayor wala gayod molurang sa iyang pagpaningkamot aron lang mapasabot ug iyang ikapaabot sa presidente nga namasangil kaniya nga drug protector ang iyang habig.

Sa iyang pagpaningkamot nga makasulti personal ang presidente giduol na niini ang iyang mga angayang duolon nga suod sa presidente ma-kaalyado man sa politika o personal nga higala sa presidente. Apan ang tanan pakyas tungod kay ang gipangduol sa mayor nga iyang gituohan nga makatabang kaniya pulos milihay kay dili gusto nga maapil sa salida.

Karon maingon nato nga tungod sa iyang grabe nga pagpaningkamot nga bahala na lang og lamokon sa pagpinaabot sa gawas nga bahin sa dapit diin anaa sa sulod ang Presidente  giagwanta lamang kining tanan sa kanhi mayor.

Wa masayop si Mike sa iyang pag-antos kay nakasulti ra gayud niya ang presidente dili lamang kausa kun dili kaduha na. Igo kining rason nga makapahayag sa dagway ni Rama kay ang iyang gipaningkamotan iya gayud nga nakuha. Apan nagpabilin gihapon ang dakong hagit sa kanhi mayor ug kini mao ang pagbakwi sa presidente sa iyang pasangil nga siya drug protector.

Sa panagkita sa kanhi mayor ug Duterte ug sa makita nato sa dagway sa duha ka opisyal hapit na kaha maabsuwelto sa Presidente si kanhi mayor Mike Rama? Ambot lang.