EDITORYAL – Pagdaot lang sa dungog

Ang pagtipig og daghang shabu usa ka dakong kalapasan sa balaod ug ang mohimo niini mahimong dakpon, pasakaan og kaso ug ipaslak sa bilanggoan. Labaw na kon ang shabu anha tipigan sa balay, mosamot nga wala na g’yuy rason pa. Kon ang usa ka ordinaryong tawo nasayod nga usa kini ka ilegal, unsa pa kaha ang usa ka heneral sa kapolisan?

Si Presidente Duterte midiskurso dinhi sa Sugbo kaniadtong Sabado ug misubli pag-ingon nga si Daanbantayan Mayor Vicente Loot dili lang drug protector, kon dili, drug lord na gyud kay nagtipig kini og daghang shabu sa usa sa mga kuwarto sa iyang panimalay.

Gidayeg ang kampanya ni Presidente Duterte sa pagpuo sa mga gidiling drugas, apan mora’g dili na usab makiangayon nga bisan og walay ebidensya, pakauwawan ug butangbutangan ang usa ka tawo og bug-at kaayong pasangil.

Bisan pa og ibutang nato nga tinuod ang pasangil nga si Mayor Loot usa ka drug lord, mobutang kaha siya og mga ilegal nga drugas sa iyang balay? Isip retiradong heneral sa kapolisan, nasayod si Loot unsay mahitabo niya kon masakpan nga magtipig og drugas .

Ang nindot gyud unta sa mga naghatag og report ngadto sa presidente mao nga ilang gironda ang balay ni Mayor Loot kay may ilegal nga drugas man kaha nga gitagoan, dili kay igo lang sila nga mohatag og report ngadto sa presidente.

Sa ilang gihimo, mabutang lang sa kataw-anan si Duterte tungod sa walay klaro nila nga report. Ang presidente kompleto sa mga kasayuran gikan sa lainlaing intelligence networks sa kapolisan ug militar. Ang tukma unta nga himoon sa mga tinugyanan sa balaod, mao nga rondahon nila ang balay sa mayor kon may lig-on sila nga basehanan nga may gitago nga shabu didto.