Senate president hulipan na karon

Karong adlawa gipaabot nga adunay “fireworks” nga mahitabo sa Senado tungod sa gihugonhugon nga kudeta sa mga senador aron ilisan si Senate President Koko Pimentel.

Mga 14 na ka senador ang mipirma sa resolusyon nga magbutang kang Senador Tito Sotto isip senate president. Kon mopirma si Senador Grace Poe, mailisan na si Pimentel.

Para nako, hilaw pa si Pimentel nga modumala sa Senado. Tinuod nga Bar topnotcher siya apan wala niya ma-manage pag-ayo ang Senado nga nagyagaw, mga senador bisan kauban sa mayoriya nag-awayay, mga hearing gubot pa sa lukot, ug daghang mga balaodnon (kasagaran tipik sa legislative agenda ni Pres. Duterte) nga nalingkoran ug wala matagad sa Senado.

Wala na makaagwanta ang mga senador sa mayoriya mao nga gusto silang ipuli si Sotto.

Apan ang mga Senador sa Liberal Party dili gustong mapulihan si Sotto. Aw, kon wala mo makaila, si Pimentel anak ni Nene Pimentel nga kalihim kaniadto ni anhing presidente Cory Aquino. Matud pa sa mga netizens sa Facebook, may pagka-yellow diay kini si Koko.

Apan bahala na unta og yellow, basta maayo lang og agi. Wala man pud maayong agi si Koko isip senate president.

Maayo ra gyud nga ilisan.

* * *

Adunay gipagawas nga survey ang kampo ni Mayor Tomas Osmeña nga kunohay nag-ingon nga mas sikat si Tomas kay kang Mike Dino, ang presidential assistant for the Visayas ni Pres. Duterte.

Naglibog ko nganong ikomparar si Tomas ug si Dino nga si Dino wala may planong modagan og mayor. Pero sa akong nahibaw-an nga ang tinuod nga survey nag-ingon nga mas taas og rating si Bise Mayor Edgardo Labella bisan sa iyang pagkahilumon.

Ang survey-survey nagkanayon nga mas taas pa og rating si Mike Rama kay kang Mike Dino.

Unsa may tuyo nga ipanghambog man ang ingon niining survey? Kon taas na og rating si Tomas, nganong manghambog pa man sa mga tawo? Busa makahibulong kaayo.

Usa ra akong pagtuo.  Tingale ipanghambog sa kampo ni Tomas ngadto sa Malacañang nga siya kunohay ang sikat sa siyudad. Ang problema kay nahibalo na ang Malacañang kinsa siya ug unsay iyang mga binuang. Ug ang Malacañang dili dayon motuo sa ilad-ilad nga survey.

Pero human sa maong survey-survey, gidawat ba si Tomas ni Duterte?

Nganong wala man siya pasudla sa private dinner ni Duterte uban sa mga mayor didto sa Waterfront Hotel ug sa Andama nga kagrupo unta niya. Ang Malacañang mismo ang mimando nga dili ipa-imbitar si Tomas. Si Mike Rama nga kunohay mas taas pa og rating ni Mike Dino mi-ukoy sa presidente didto sa Waterfront, pero igo ra gyud siyang gilamano. Wala siya estoryaha.