Hinaut nga pabiling supakiro

Karon nga pipila ka semana, gituohan nga mausab na ang kamada diha sa konseho sa dakbayan sa Sugbo.

Kini gumikan kay mobali na kuno ang hangin ug mayoriya sa mga sakop niini ang kaalyado na ni Mayor Tomas Osmeña.

Sa 80 ka barangay sa siyudad, 15 lamang kaniadto ang kaalyado sa Bando Osmeña Pundok Kauswagan, ang politikanhong grupo ni Osmeña. Apan human sa eleksiyon niadtong Lunes, misaka ngadto sa 49 ang barangay nga ilawom sa BOPK.

Weather, weather lang. Ang oposisyon na usab ang nadehado karon.

Kaniadto halos nangharos ang Team Rama sa mga barangay. Kini bisan pa kon gipildi ni Osmeña si kanhi mayor Michael Rama sa ilang rematch alang sa renda sa pangagamhanan sa dakbayan.

Niining bag-o nga kalamboan, mura’g matuman na gayud ang panaad ni Osmeña nga iyang langkaton ang pamunoan sa Association of Barangay Councils gikan sa oposisyon.

Ang kasamtangan nga pangulo sa ABC nga si Tisa barangay captain Philip Zafra haligi man sa oposisyon ug usa sa mga sakop diha sa konseho sa siyudad.

Dako ang posibilidad nga mabag-o ang liderato sa ABC. Gamiton gayud ni Osmeña ug BOPK ang tanan aron nga mapildi si Zafra sa umaabot nga ABC election.

Kon kwartahay lamang, lupigon gayud si Zafra ug mga kaalyado niini sa oposisyon.

Kon mahitabo kana, hayag na unya ang tsansa nga malangkat sa BOPK ang mayoridad sa konseho sa dakbayan. Sa pagkakaron, labaw og pipila ka botos ang Barug Team Rama PDP-Laban diha sa balay balauranan sa siyudad.

Apan sa akong nakita, bisan pa kon makuha ni Osmeña ang mayoridad sa konseho, pabiling supakiro ang mga sakop sa opisiyon.

Dako gihapon sila nga puwersa nga mobabag sa mga lakang sa ehekutibo nga tan-aw nila dehado gayud ang dakbayan.

Hinuon maayo man usab kanang dunay check and balance diha sa City Hall.

Kay sum-od usab kaayo kon nagsige lang og yango-yango ang mga miyembro sa konseho sa unsay gusto sa mayor nga mora na hinuon og diktador.