Ipahungaw ayaw pugngi (3)

* Ang gibuhot nga ‘gasses’ (hydrogen sulfide) – Indikasyon usab kini nga ang atong lawas, dominante pa nga gikontrol sa mga maayong bakterya, aron ipabilin ang lig-ong sistema nato sa imyun.

Ang himsog nga yagpison o gagmayon og lawas, sagad kanunay makapabuhot, samtang sa mga tambokon o dagko’g lawas, talagsa ra makapabuhot. Busa aron mogana ang trabaho sa pagtunaw sa kinaon, mga ‘fibers’ sa prutas ug utanon, maoy atong palabihon nga kaonon. Aron mokugi ang mga maayong bakterya, nga tunawon o hilison ang atong mga gikaon.

* Ang hanging gibuhot sa lubot – makaayo ni sa hugaw nga igawas, aron komportable pamation sa lawas. Ang hanging toksik nga mapundo sa tiyan, makalipong ug makasakit, magdaguok ang tiyan nga mura’g gutom bisag busdik sa kinaon. Busa ayaw gyud santaa o pugong-pugongi, ibuhot paghurot nga mahamugaway sa kondisyon ang lawas.

Ayaw na hunahunaa ang kaulaw, maoy mahinungdanon ang resulta nga makaayo sa panglawas. Angay ta nga malipay nga ning maong kondisyon, aktibo pa diay kaayo ang mga maayo’ng bakterya, nga katabang sa pagpahimsog sa panglawas.

* Batyaga gyud ang kaayo sa pagbuhot – Way sama sa kaayohan nga mahatag sa pagbuhot sa dautang hangin, kay tungod ini, malimpyohan ang utok ug lawas nga mapuwerhisyo sa negatibong pamation sa panglawas.

Sa kasipa sa hinungaw sa makahilong hangin, bahala na ang kaulaw maoy mopahiamgo niadtong nakahanggap niini, nga panagsa makahatag sab kini’g benepisyo kanila, mao pasagdi nga igo na lang kita nga mopahiyum.