Pagtangtang ni Sereno legal

Husto gyud ang komedya nga gipasikat ni kanhi presidente Erap. “Ang buhay ng tao ay weather-weather lang.” Panahon sa administrasyon ni PNoy, si Supreme Court Chief Justice Maria Lourdes Sereno gamhanan kaayo kay siya ug si PNoy suod man.

Adunay pipila ka dagkong lider sa nasud, nataktak sab sa katungdanan atol sa pagdumala ni Sereno sa Korte Suprema kay gipasanginlan sila nga nakahimo og kahiwian, sama sa pagpangawkaw.

Nanaog sila sa puwesto nga luhaan ug bug-at ang kasingkasing, sanglit ilang nasabot nga dili makiangayon kanila ang hukom sa Korte Suprema sa ilang kaso.

Ang katin-aw ug kalinis sa gihuptan nilang testimoneya aron sa pagpanalipod sa ilang katungod, wala man intawo’y igong gahum nga ikasugakod.

Kon unsa’y nasinati sa nangaging opisyal panahon sa pangagamhanan ni PNoy, mao usab kini ang gibati ni Sereno karon.

Daghan ang misaway sa pagtangtang ni Sereno kay dili kuno kini patas ug makatarunganon.

Gani, may mga abogado man nga mipabati sa ilang labihang kasagmuyo: “Justice in the Philippines is dead.”

Karon pa mo nahibalo niini, attorney? Kahagbay ra niini, ah! Sa lower court pa lang, may timbangan na sa hustisya nga dili genuine. Pila na ba ka pobre ang wala’y sala nga tungod kay walay sarang ikahayir og abogado, maoy napriso. Pero ang dato nga maoy tinuoray nga kriminal, nagpabiling gawasnon kay gipalit man ang balaod.

Sa laing bahin, gikalipay sa mga OFWs ug sa mga Duterte diehard supporters ang pagkataktak ni Sereno sa puwesto kay nawala na ang katapusang alas sa mga Yellowtards.

Masugdan na gyud pagkawot sa mga magbabalaod ang tinipigang baho nga hagbay ra nga gitakpan sa mga salawayong anino aron dili moalisngaw ang kamandag nga maoy mounay’g hukas sa ilang tinuoray nga pagkatawo.

Korte Suprema ang mitaktak ni Sereno. Nindot unta kon ang ipuli niya, dili na mataktak.