Suroy-suroy sa Bogo

Pagpamalandong sa Malangkubong kaayohan

Nagpaabot ko nga daghan ang mokuyog nga mga katekista apan diyotay ra man diay. Mas maayo ra pud aron dili mabug-atan. Tuod man gisuroy ang mga simbahan apil na niini ang nabantog nga simbahan sa Odlot. Wala si Nyor Ilde mao nga kang Padre Pat na lang ko nakigsulti. Daghan mi og gipanagsultihan apil na niini ang kinabuhi sa pagpangalagad. Kuyog niini ang mga kabalaka ingon man ang mga pangindahay. Salamat sa iyang presensiya ingon man sa iyang pagdawat nabusog ako dili lang sa pagkaon kon dili sab sa mga pagmaymay ug mga pahimangno. Kini ang kuwang sa kadaghanan nato karon. Kini ang hinungdan kun nganong daghan ang di makaako sa pagpakabana sa panginahanglan sa usa’g-usa kini tungod kay wala man ang personal nga paghikap ug pagtimbaya. Ang panaw padayong mahitabo diha sa kinabuhi nato. Gani nalipay ako sa niaging adlaw kay dunay linalang nga kanako nagtudlo nga angayan lamang puy-an ang bisan unsang anaa sa kasamtangan. Ang paghimo sa ingon makatabang aron mas malipay kita sa pagkakaron.... kay ning paagiha kita gipahinumdoman nga ang panagkuyog mahinungdanon kaysa bisan unsang kalampusan.