EDITORYAL - Silotan ang sad-an

Nag-atubang karon og dakong hagit ang imbestigasyon sa Senate Blue Ribbon Committee kabahin sa pagpalit og dengvaxia vaccine kay adunay mga senador nga dili motuo nga matinud-anon ang mga pasangil batok sa pipila ka opisyal sa nakalabay’ng administrasyon. Si Senador Panfilo “Ping” Lacson dili gyud mopirma sa resolusyon sa Senate Inquiry bahin sa dengvaxia vaccine kay gusto ni Senador Dick Gordon nga iapil si kanhi presidente Benigno “Noynoy” Aquino sa mga pasakaan og kaso.

Si Lacson mipasangil nga sa pagsugod pa lang sa mga hearing, nakamatikod na siya nga ingon sa gipuntariya ni Gordon si Aquino aron mogawas nga may kalambigitan gyud kini sa pagpalit sa kagamhanan og bilyones pesos nga kantidad sa mga bakuna gikan sa Sanofi Pasteur. Ang baruganan ni Lacson mao nga silotan ang mga angay’ng silotan, ug kinahanglan nga wala kini bulok sa personal nga interes.

Kon tinuod man nga may kalambigitan ang dengvaxia sa kamatayon sa pipila ka mga bata nga nabakunahan, unsa man nga hustisyaha ang makuha sa mga pamilya sa mga namatyan kon “subjective” kaayo ang dagan sa imbestigasyon, inay nga kuykuyon ang kamatuoran? Sa laktud nga pagka-estorya, kining isyu sa dengvaxia nahimo na nga pamolitika sa uban, ug dili na tinuod ang ilang tumong kay ang mga senador nag-iyahay ra og pasikatay.

Matud pa nga sad-an si Aquino kay napalit ang maong mga bakuna batok sa dengue atol sa iyang administrasyon. Paigo na ba kini nga basehan aron siya apilon sa kiha? Sa panahon ni Aquino, misaka og maayo ang gidaghanon sa mga tawo nga nasakit ug nangamatay sa dengue. Ang pagbakuna usa sa mga paagi aron masanta ang pagkuyanap sa dengue. Karon, sala na diay sa presidente nga mangita siya’g pamaagi aron masalbar ang kaliboang kabataang Pilipino? Tingali kon doktor pa si Aquino ug espesyalista sa dengue, ug ingon niini ang nahitabo, posible tingali nga apilon siya sa pagkiha.